2019 senesi ilk yaz (iyün) ayı 18 künü Ukraina Yuqarı Şurasınıñ qanuncılıq İnstitutında Ukrainada Gans Zaydel Fondunıñ qol tutuvı ile ”Fevqulâde şaraitlerde devlet idaresi: Ukrainada arbiy-grajdanlıq memuriyetlerniñ teşkiliy-uquqiy esasları” mevzusında tögerek masa olıp keçti, tedbirde Ukraina Yuqarı Şurasınıñ deputatları, Ukraina Milliy havfsızlıq ve mudafaa Şurasınıñ, vaqtınca işğal etilgen topraqlar boyunca Ukraina Nazirliginiñ, Ukraina adliye Nazirliginiñ vekilleri, Ukraina Havfsızlıq hızmetiniñ ve Ukraina içki işler Nazirliginiñ mütehassısları ve alimler iştirak ettiler.

Tedbir iştirakçileri Donetsk ve Lugansk vilâyetlerindeki Aniterroristik ameliyat/Birleşken quvetlerniñ ameliyatı bölgesi misalinde arbiy-grajdanlıq memuriyetlerniñ tecribesini ve fevqulâde şaraitlerde devlet idaresini muzakere ettiler.

Ukraina prezidentiniñ Qırım MC Temsilciligindeki halqara alâqalar hızmetiniñ reisi Yevgen Samuha öz çıqışında al-azırda Qırımnı Ukraina devleti tarafından idare etüv yarımadadaki işğalci akimiyetniñ ya da Rusiye akimiyetiniñ areketlerine quymet kesüvden ibaret olğanını ve qıtaiy Ukrainada Qırım sakinlerine devlet idareler tarafından memuriy hızmetlerni berüvnen sıñırlanğanını yazıqsınıp bildirdi. Onıñ içün acele sürette Qırım MC-ni ve Aqyar şeerini işğalden azat etüv ve ğayrıdan integratsiyaları boyunca kompleks vesiqalarnı azırlap tasdıqlamaq ve kelecekte olarnı milliy ve regional seviyelerde mütenasip devlet idaresi organları tarafından amelge keçirmek kerek.