2018 senesi ekim (oktâbr) ayı 25 künü Ukraina Prezidentiniñ Qırım MC Daimiy Temsilcisi Borıs Babin genotsid cinayetiniñ ihtarı ve cesası aqqında Konventsiyanı qabul etüvniñ 70- yıllığı munasebeti ile Odessa Golokost müzeyi ve temelli araştıruvlarğa qoltutuv Fondu tarafından Odessa şeerinde teşkil etilgen ‘‘Golokost ve halqara uquq’’ mevzusında Halqara ilmiy konferentsiyada Skype vastasınen iştirak etti.

Konferentsiyanıñ teşkilâtçıları ve iştirakçileri Genotsid cinayetiniñ ihtarı ve cesası boyunca halqara uquqnıñ nazariye ve ameliyatını şekillendirüvge Golokostnıñ tesirine ve olarnıñ halqara-uquq şuurında aks etilüvine diqqatlarını ayırdılar.

Borıs Babin tedbirniñ iştirakçilerine vaqtınca Qırım işğali şaraitlerinde Golokostnıñ Qırım yarımadası içün aqibetini tarif etti, RF işğalci akimiyeti Ekinci cian cenkiniñ facialı adiselerni yarımadada milletlerara duşmanlıqnı qozğalamaq içün işletkenini bildirdi. Daimiy Temsilci Golokostnıñ qırımçaqlarğa facialı tesirini ve qırımtatar halqına qarşı genotsid boyunca davanı mahkemede baqılması kerek olğanını qayd etti, teessüf ki, bu ceryan al-azırda toqtatılğan aldadır.