2018 senesi ilk yaz ayı (iyün) 8 ve 9 künleri Ukraina Prezidentiniñ Qırım MC Daimiy Temsilcisi Borıs Babin ve Temsilcilikniñ diger hadimleri ‘‘Gürcistan, Moldova ve Ukraina: regional ve havfsızlıq işbirliginiñ parlamentler arası komponentini quvetleştirüv ve Avropa Birligi ve Şimaliy Atlantika Añlaşması Teşkilâtı ile işbirlikniñ inkişafı’’ Ekinci parlamentler arası konferentsiyasında iştirak ettiler.Konferentsiyanıñ strategik maqsadı – demokratik qıymetlerni ögge keçirüv, umumiy havfsızlıq sistemasını teşkil ve temin etüv, iqtisadiy ceetten istiqrarlı olğan devlet idaresiniñ qurucılığı ve memleketlerniñ avropalı uquqiy şartlarına binaen islâatıdır.

Tedbirde Avropa parlamentiniñ deputatı, EURONEST Parlament assambleyasınıñ yolbaşçılarından biri Rebekka Harms, Gürcistan Parlamentiniñ Başlığı İrakli Kobahidze, Moldova Cumhuriyeti Parlamentiniñ Başlığı Andrian Kandu, Ukraina Yuqarı Şurasınıñ Başlığı Andriy Parubiy, Ukraina Yuqarı Şurası tışqı işler Komitetiniñ başlığı Ganna Gopko, Ukraina, Gürcistan ve Moldova parlamentleriniñ diger deputatları, Avropa ve AQŞ halqara ekspertler, Avropa Şurasınıñ deputatları, Litva ve Latviya şuralarınıñ deputatları, Ukrainada çetel memleketlerniñ diplomatik teşkilâtlarınıñ ve ukrain cemaat teşkilâtlarınıñ temsilcileri ve jurnalistler iştirak etti.

Ukraina Yuqarı Şurasınıñ Başlığı Andriy Parubiy konferentsiyanı açar eken, onıñ esas vazifelerinden biri, Putin yolbaşçılığındaki  Rusiye bütün medeniy dünya içün telüke doğurğanını añlatmaqtır. ‘‘Dünyada bügün Ekinci cian cenkinden soñ eñ qıyın devirlerden biri, eñ ciddiy geopolitik çağıruvlardan ve küçlü sarsıntılarnıñ biri yaşanmaqta. Ukraina bunı rusiye istilâsı neticesinde is etti. Amma biz bunı yahşı añlamalımız ki, Ukrainağa qarşı rusiye tecavüzi bu yalıñız eki memleket arasında ihtilâf degil, bu yalıñız Rusiyeniñ Ukrainağa qarşı istilâsı degildir. Fikirimce, Putin bütün medeniy dünyağa qarşı çıqtı ve asılında biz onıñ tecavüziniñ farqlı ceetlerini seyir etemiz – o Avropağa qarşı, Şimaliy Atlantik Birligine qarşı, bütün medeniy dünyağa qarşıdır’’, – dep qayd etti Ukraina Yuqarı Şurasınıñ Başlığı.

Konferentsiyanıñ birinci panelinde çıqışta bulunır eken, Daimiy Temsilci Borıs Babin, istilâcı devletniñ bozucı tesiri işğal etilgen topraqlarda vahşiy cinayelernen sıñırlanmayıp, başqa devletlerde parlamentlerniñ faaliyetine tesir etüvniñ bir şekili olğanı içün, parlamenler arasında işbirlik pek emiyetli olğanını qayd etti. Borıs Babin, memleket içinde köçken şahıslarnıñ aq-uquqlarını qorçalav ve memleketlerimizniñ işğal etilgen topraqlarında uquqiy tertipni belgilev saasında tecribenen paylaşuvnıñ ameliy qıymeti pek yüksek olğanını hatırlattı.

Konferentsiyanıñ başında Gürcistan Parlamentiniñ, Moldova Cumhuriyeti Parlamentiniñ ve Ukraina Yuqarı Şurasınıñ Başlıqları Gürcistan Parlamenti, Moldova Cumhuriyeti Parlamenti ve Ukraina Yuqarı Şurası arasında Parlamentler arası assambleyanıñ teşkil etilüvi aqqında Beyanatnı imzaladılar. Assambleyanıñ tertibi ve faaliyetiniñ esasları Tbilisi şeerinde Assambleyanıñ başlanğıç sessiyasında qabul etilecek Nizamnamesinde aks etilecektir. Vesiqanı Gürcistan Parlamentiniñ Başlığı İrakli Kobahidze, Moldova Cumhuriyeti Parlamentiniñ Başlığı Andrian Kandu, Ukraina Yuqarı Şurasınıñ Başlığı Andriy Parubiy imzaladılar.

Tedbir panel munaqaşalar şekilinde keçti. Birinci panel ‘‘Yañı telüke çağıruvlarına qarşılıq kösterüv’’. Ekinci panelniñ mevzusı – ‘‘Ukraina, Gürcistan, Moldova: Assotsiatsiya aqqında añlaşmadan başlap, Avropa Birligine tolu integratsiyağa qadar’’. Üçünci panel ise ‘‘Siyasiy dialog ve konsensusqa irişüv’’ edi.

Tedbir devamında propaganda ve yalanci haberlerge qarşılıq kösterüv, istiqrarlı iqtisadiy inkişaf ve uquqnıñ üstünligi, energetik havfsızlıq, Assotsiatsiya aqqında añlaşmanıñ imzalanuvından başlap, Avropa Birligine tolu integratsiyağa qadar memleketniñ yolu ve umumiy havfsızlıq içün telükeler kibi meseleler muzakere etildi. ‘‘Gürcistan, Moldova ve Ukraina: regional ve havfsızlıq işbirliginiñ parlamentler arası komponentini quvetleştirüv ve Avropa Birligi ve Şimaliy Atlantika Añlaşması Teşkilâtı ile işbirlikniñ inkişafı’’ Ekinci parlamentler arası konferentsiyasınıñ çerçivesinde yañlış malümatlarğa regional cevapnıñ azırlanuvı boyunca mahsus ekspert munaqaşası keçirildi.

Munaqaşa devamında ekspertler RF tarafından mevcüt, ya da imkânı olğan haber tecavüzlerine qarşılıq kösterüv yollarnı, yaş nesilni azırlamaq ve RF tarafından hususan içtimaiy ağlarda yapılğan manipulâtsiya areketlerni añlamağa ögretmek içün mekteplerde ve universitetlerde gençler içün aydınlatuv faaliyetini muzakere ettiler.