2018 senesi fevral 14 künü Ukraina Prezidentiniñ Qırım Muhtar Cumhuriyetindeki Daimiy Temsilcisi Boris Babin USAİD agentliginiñ, Halqara uquqiy inkişatı teşkilâtınıñ (IDLO) temsilcilerinden ve ‘‘Cemiyetniñ işançını qaviyleştirgen ukrain teşebbüsi’’ leyhasınıñ mütehassıslarından ibaret olğan eyet ile körüşti.
Körüşüvniñ arfesinde işbu halqara teşkilâtlarnıñ temsilcileri vaqtınca işğal etilgen Qırımnıñ sakinlerine pasport meselelerinen bağlı memuriy hızmetlerni bergen merkezlerge tehnikiy yardım bermek niyetinen Qalançaq rayon devlet memuriyetiniñ, Qalançaq ve Mirne birleştirilgen territorial cemiyetleriniñ öz-özüni idare etüv organlarınıñ vekilleri ile körüştiler. Bundan ğayrı, olar Herson vilâyeti devlet memuriyetiniñ ve Herson şeer şurasınıñ vekilleri ile körüşmege niyetleneler.
Boris Babin Temsilcilik bu yönelişte yapqan areketlerni tarif etti. Ukraina Devlet migratsiya hızmetiniñ organları, devlet rayon memuriyetleri, öz-özüni idare etüv organları ile beraberlikte Temsilcilik Herson vilâyetinde memuriy hızmet merkezleriniñ ağını teşkil etmek içün adım-adım algoritmni azırladı. Bu algoritm memurlar içün yañı iş yerleriniñ açıluvını, memuriy hızmet merkezleriniñ Milliy gizli alâqa sistemasına qoşulması, iş yeriniñ tehnikiy şartlarınıñ azırlanması kibi memuriy hızmet merkezleriniñ teşkil etilüvi içün kerekli şartlarnı belgiley.
Algoritmniñ işletilüvi çerçivesinde 2018 senesiniñ birinci yarısında Kahovka şeerinde, Novotroyitske ve Çaplınka qasabalarında memuriy hızmet merkezlerini teşkil etilüvi ve Herson şeerinde mevcüt olğan merkezniñ keñişletüvi planlaştırıldı. Qoşma olaraq, Temsilcilikniñ muracaatlarına binaen Herson şeerindeki ‘‘Document’’ DM-niñ keñişletüvi neticesinde 2018 senesi aprel ayınıñ başına qadar Herson vilâyetinde Qırım sakinlerine pasportlaşma hızmetleriniñ imkânlarını 3 qat arttırmağa planlaştırıla.
Bundan da ğayrı, ‘‘Qalançaq’’ KÇNN-na ve Ukrainanıñ diğer regionlarınen bağlana bilecek ‘‘Vadim’’ demiryol stantsiyasına eñ yaqın olğan Preobrajenka köyünde böyle merkez teşkil etilmesiniñ üstünligine diqqat etildi. ‘‘Qalançaq’’ ve ‘‘Çongar’’ KÇNN-nı minimal seviyede abadanlaştırmaq, ‘‘Vadim’’ demiryol stantsiyasına qadar demiryol naqliyatını uzatmaq ve Herson şeerinden, Qalançaq qasabasından ve Preobrajenka köyünden KÇNN-na qanuniy avto naqliyatını teşkil etmege kerekligi qayd etildi.
Körüşüvniñ neticesi olaraq, halqara teşkilâtlarınıñ temsilcileri memuriy hızmet merkezleriniñ teşkil etilüvine tez, çabik ve qısqa vaqıtta yardım berilmesi içün çalışmağa azır olğanlarını beyan ettiler. Taraflar kelecekte işbirlik aqqında añlaştılar.