2018 senesi ilk yaz ayı (iyün) 22 künü Taras Şevçenko adına Kıyiv milliy universitetiniñ Halqara munasebetler institutında Ukraina halqara uquqı akademiyasınıñ ‘‘Halqara uquq iliminiñ ve ameliniñ inkişafı’’ mevzusında ameliy-ilmiy konferentsiyası olıp keçti.

Konferentsiyada çıqışta bulunğan Ukraina Esas qanun mahkemesiniñ yolbaşçısı Stanislav Şevçuk, Ukraina Prezidenti Memuriyetiniñ Reis muavini Oleksiy Filatov ve Ukraina Çetel işler Naziriniñ muavini Olena Zerkal zemaneviy şaraitlerde Ukraina içün halqara uquqnıñ emiyetini qayd ettiler.

Olena Zerkal çıqışta bulunır eken, milliy cinaiy tedqiqatlarnıñ Halqara cinaiy mahkemesinde ceryanlardan farqını Ukraina uquq qorçalav organlarına ekseriy allarda añlatmağa qıyın olğanını qayd etti. Nazirniñ muavini istilâcı devlet ile Ukrainanıñ añlaşmalarınınıñ toqtatıluvı mevzusında, bu cümleden, Azaq deñizi ve Keriç boğazı meselelerinde de halqara uquq iliminiñ ameliy kerekligini qayd etti.

Ukraina Prezidentiniñ Qırım MC Daimiy Temsilcisi Borıs Babin konferentisya iştirakçileri ögünde yapqan maruzada rusiye isilâsına qarşılıq kösterüv oğrunda Temsilcilikniñ faaliyetinde halqara-uquqiy ölçevni belgiledi ve 2018 senesi ilk yaz ayı 20 künü qabul etilgen Rusiye istilâsına qarşılıq kösterüv boyunca acele areketler Planınıñ mütenasip tedbirlerini aydınlattı.