Herson vilâyetine iş ziyareti çerçivesinde Prezident Petro Poroşenko 2018 senesi Herson devlet deñiz akademiyasına oğumağa kirgenlerniñ kursantlar saflarına qabul etilüvine bağışlanğan ‘‘Genç nesiller estafetasında’’ iştirak etti.

Devletimizniñ Başlığı Herson devlet deñiz akademiyasını ‘‘deñiz tasiliniñ küçlü oquv-ögretüv bazası olğan esas merkezlerinden biri’’ dep adlandırdı. ‘‘Bügünde-bügün kursantlar arasında Ukrainanıñ eñ güzel oğulları ve qızları bulunmaqta. Oğlan ve qızlar büyük miqdarda kursant olmağa arzulağanı Ukraina deñiz devletiniñ parlaq kelecegine işanç doğura’’- dep qayd etti o.

‘‘Aliy oquv yurtuñıznıñ talebeleri kelecektekte devletimizdeki flotunıñ qaviy temeli olıp, ulu deñiz devleti Ukrainanıñ şanlı adetlerini devam eter’’, – dep qayd etti Petro Poroşenko.

O, başqa kursantlarnen beraber, akademiyada Qırımdan 108 kişi oquğanını qayd etti: ‘‘Bu, Ukraina Yuqarı Şurası menim tekliflerimni qabul etip, qırımlılar içün qolaylaştırılğan usulnen Ukrainanıñ bir qısımı olğanlarını numayış etmege imkân yaratqan qanunnı qabul etmesinen mümkün oldı. Bügünki merasimde de kursantlar arasında qırımlılar bulunmaqta’’.

Devletimizniñ Başlığı ayatından az bilingen vaqianı tarif etti – mektepni bitirgen soñ o, aliy deñiz mektebine kirgen edi. ‘‘Çünki deñizni arzulay edim ve kubrik starşınası bile olıp yetiştirdim. Soñra ise aynı vaqıtta halqara munasebetler institutına da kirgenim aqqında vesiqalar keldi. Ve taqdirim deñiz yolundan başqa tarafqa çevirildi. Amma onıñ romantikası yüregimde ebediyen qaldı’’.

Petro Poroşenko Hersondaki deñiz akademiyası halqara yatırımcılar ile sıqı işbirlikte çalışqanını ve bunıñ neticesinde ögretüv bazasını dünya seviyesine ketirmege mümkün olğanını qayd etti. 2016 senesi oquv yurtıñıznı ziyaret etken arada buña şahsen qandım. ‘‘Marlow Navigation’’ yatırımcı şirketiniñ reberi German bey İden bu tedbirde bulunğanı da pek müim adisedir. Herson devlet deñiz akademiyasınıñ kelecegi fantastik olğanında eminim’’, – dep qoştı Prezident.

Devletimizniñ Başlığı deñiz akademiyasınıñ kursantlarına ‘‘yahşı oqup, tınç Ukrainanıñ qurucılığı içün muim olğan zenaatlarnı ögrenmekni’’ tiledi.

Merasim esnasında Petro Poroşenko birinci kurs talebelerine güyslarını (deñizci yaqalarını) kiysetti.