Oktyabr 31 künü Ukraina Prezidentiniñ Qırım Muhtar Cumhuriyetindeki Daimiy Temsilcisi Boris Babin ve onıñ Birinci muavini İzet Gdanov Herson devlet universitetniñ reberiyeti ve studentleri ile körüştiler. Körüşüv devamında 2017-2018 oquv yılına kiriş kampaniyasınıñ neticeleri muzakere etildi. Qırım sakinleri Qıta Ukrainada aliy oquv yurtlarınıñ bayağı zenaatlarğa tış mustaqil imtianını tapşırmadan kire berecekleri qayd etildi ve bu malümatnı Qırımda darqatuv yolları tüşünildi.

Daimiy Temsilci aytqanına köre, Qırım sakinleriniñ Herson aliy oquv yurtlarında oquv ceryanı Temsilcilikniñ daimiy nezaretinde bulunacaqtır. Bundan da ğayrı, Rusiye Federatsıyasınıñ Qırımdaki işğalci akimiyeti tarafından qanunsız şekilde tasil aqqınıñ bozuluvı, bu cümleden, talebelerni, mektep mezunlarını, studentlerni ve olarnıñ anababalarını qorqutuv, Ukrainadaki tasil aqqında yañlış malümat darqatuv kibi cinayetler diqqatsız ve сezasız qalmaycaq.

Daimiy Temsilciniñ Birinci muavini İzet Gdanov vaqtınca işğal etilgen topraqlarında yaşağan Ukraina vatandaşları içün maarif saasında qıtada imtiyazlı şaraitler yaratılqanını tarif etti ve vaqtınca işğal etilgen topraqlarda berilgen tasil vesiqalarınıñ faydasız olğanını, işbu ”feyk” vesiqalarnı Ukraina ve başqa itibarlı devletler qabul etmeycegini hatırlattı.