2020 senesi qara qış (yanvar) ayı 13 künü Ukraina Prezidentiniñ Qırım MC-deki Daimiy Temsilcisi Anton Korınevıç ve onıñ muavini Tamila Taşeva Herson vilâyeti devlet memuriyetinde selektor muşaverede iştirak ettiler. Qırım MC ile Aqyar şeeriniñ sakinleri ve memleket içinde köçken şahıslar içün muim olğan meselelerni muzakere ettiler.

Qırım gençleri içün qıta Ukrainada mevcüt olğan imkânlar boyunca kütleviy haber kompaniyasınıñ keçirilüvi, tasil hızmetleriniñ berilüvini qolaylaştıruv, Qırımda yaşağan balalarnıñ ukrain tasil ve medeniy leyhalarına daa faal şekilde celp etilüvine qol tutuv aqqında añlaştılar.

Vaqtınca işğal etilgen yarımadanıñ sakinlerine tıbbiy hızmetlerni berüvde keyfiyetli tıbbiy yardımğa irişimlerini temin etmek maqsadınen teletıbbiy tehnologiyalarnıñ işletilüvi aqqında da laf ettiler.

Herson vilâyetindeki Geniçesk rayonında Qırımdan köçkenler içün mahsus şeerçikniñ quruluvı planlaştırıldı. 4,5 gektarlıq arsada 6 dane 336 daireli dört qatlı ev qurulacaq. Leyhanıñ tahminiy fiyatı – 160 mln grn. Al-azırda maddiy menbalar, bu cümleden Ükümet tarafından qol tutuv imkâniyetleri qıdırıla.

Al-azırda Herson vilâyetiniñ devlet memuriyeti, Veteranlar nazirligi, Ukraina Prezidentiniñ Qırım MC-deki Temsilciligi, cemaat teşkilâtları ile beraber vatandaşlarımız içün işbu teşebbüslerniñ eñ yaqın vaqıtta çalışıp başlamaları üzerinde çalışalar.