2019 senesi kiçik ay (fevral) 28 künü Herson şeerinde tögerek masa tedbirinde ”Herson vilâyetiniñ haber saası: vaziyeti, problemaları ve meseleni çezüv yolları” mevzusında analitik esabat taqdim etildi.

Tedbirde Temsilcilikniñ baş mesleatçıları Sergiy Skrıpnık ve Alla Rakşa iştirak ettiler.

”Ukraina havfsızlıq studiyalar teşkilâtınıñ” ekspertleri taqdim etken esabatnıñ ayrı bölükleri vaqtınca işğal etilgen Qırım yarımadası ile qomşu olğan Skadovsk, Qalançaq, Geniçesk, Novotroyitsk, Çaplınka rayonlarına bağışlağandır. Ekspertler, işbu rayonlarğa Rusiye propagandası ve yalan haberler ziyade tesir etkenini qayd ettiler.

Tedqiqatnıñ neticelerine köre bir sıra tevsiyeler azırlandı, olarnıñ arasında vaqtınca işğal etilgen Qırım MC toprağında RF tarafından yer üstü TV ve radio aglarını quruv ceryanını ve radio sıqlıq mevbalarnı işletüvni qanunsız olaraq tanımaq; ”Yekâne ses” regional platformasını meydanğa ketirmek; vilâyetni 4G alâqasınen daa ziyade qaplamaq; KÇNN yanında bulunğan adamlarğa sms vastasınen cemiyet içün muim olğan malümatlarnı, bu cümleden, memuriy, tasil ve tıbbiy hızmetlerni berüv saasındaki yañılıqlarnı yollamaq.

Şunı da qayd etmek kerek ki, keçken sene berim (sentâbr) ayında Temsilcilik Ukraina Yuqarı Şurasınıñ eki profil komitetinde vaqtınca işğal etilgen Qırım MC-de söz serbestligi ve haber siyaseti meselelerini kötergen edi.

Bu meselelerni muzakere etüv ceryanı esnasında Temsilcilik aşağıdaki meseleler boyunca öz tekliflerni yapqan edi:

– Ukrainanıñ vaqtınca işğal etilgen Qırım toprağından Herson vilâyetiniñ Qırım ile qomşu olğan rayonlarğa qanunsız TV ve radio yayınlavğa qarşılıq kösterüv ve Ukrainanıñ vaqtınca işğal etilgen Qırım toprağına Herson vilâyetinden TV ve radio yayınlavnı temin etüv;

– qırımlılar içün İnternet ve basılğan haber-cemaat vastalarnıñ meydanğa ketirilüvi içün şaraitler yaratuv;

-işğalci akimiyetniñ İnternet saifelerine ve İnternet ağındaki başqa menbalarına irişimni sıñırlav;

– Qırımda sabit ve cep telefonlı alâqa hızmetlerini bergen, ya da olarğa qol tutqan şirketlerni semereli uquqiy yolnen taqip etüv.

Komitetler tekliflerimizge qol tuttı, tevsiyeler mütenasip devlet akimiyeti organlarına ve teşkilâtlarğa berildi, olarnıñ yerine ketirilüvini bekleymiz, Temsilcilikniñ bu yönelişte faaliyeti devam ete.