2018 senesi ilk yaz ayı (iyün) 5 künü Ukraina Prezidentiniñ Qırım MC Daimiy Temsilcisi, Temsilcilikniñ vekâletli hadimleriniñ iştiragi ile Herson vilâyetindeki sağlıq saqlav muessiseleri reberleriniñ muşaveresini keçirdi. Muşaverede, bu cümleden, Qalancaq, Skadovsk, Çaplınka merkeziy rayon hastahaneleriniñ, Çaplınka birinci nevbet tıbbiy-sanitar yardım merkeziniñ, Herson vilâyet antitüberkülöz ve kardiologik dispanserleriniñ, Herson vilâyet psihiatrik ve klinik hastahaneleriniñ, G.İ. Gorbaçevskiy adına Hersov vilâyet hastahanesiniñ ve Herson vilâyet ‘‘Hospis’’ hastahanesiniñ temsilcileri iştirak etti.

Muşavereniñ neticesi olaraq, Herson vilâyetiniñ sağlıq saqlav muessiselerinde vaqtınca işğal etilgen Qırımnıñ sakinlerine tıbbiy yardımnıñ şartsız berilüvi aqqında qarar qabul etildi. Sağlıq saqlav muessiseleriniñ vekilleri vaqtınca işğal etilgen Qırımnıñ sakinlerine hızmet etmege imkânları olğanını bildirdi, amma qırımlılar hastahanelerge kütleviy şekilde muracaat etseler, qoşma olaraq maliye meselesini çezmek kerek olacaqtır.

Daimiy Temsilcisi toplaşuvda bulunğanlarğa Ukraina sağlıq saqlav Nazirligi ile işbirlik aqqında bildirdi, onıñ çerçivesinde, Herson vilâyetine Qırımdan kelgen şahıslarnıñ miqdarını esapqa alıp, qırımlılarnı Devlet büceti esabına tedaviylemek içün subventsiyalarnıñ üleştirilüvi közde tutula. Temsilcilik ve vilâyetniñ sağlıq saqlav muessiseleri Ukrainada tıbbiy islâat munasebeti ile qırımlılarnı tıbbiy yardım saasında aqları aqqında haberdar etmek kerek olğanı boyunca fikirdeş oldılar. Bu cümleden, tıbbiy islâat şartlarına binaen, qırımlılarğa Ukrainanıñ nezareti altında bulunğan topraqlarda birinci nevbet tıbbiy-sanitar merkezleri ile añlaşmalar imzalamaq kerek, Qalançaq ve Çaplınka qasabalarındaki birinci nevbet tıbbiy-sanitar rayon merkezleri böyle añlaşmalarnı imzalamağa azır olğanlarını bildirdiler.