”Ukraina Ortodoks Kilisesi Qırım Yeparhiyasınıñ yarımadaki soñki ibadethanesi olğan binadan marum etilüvi munasebeti ile Rusiye Federatsiyasına qarşı Avropa mahkemesi tarafından açılğan dava, işğalden zarar körgen vatandaşlarımıznı uquqiy ceetten qorçalav oğrundaki müim adımdır.Bundan ğayrı, işbu cemiyetniñ asılında yoq etilüvi RF cinaiy siyaseti vastasınen ukrainalılarnı Qırımdan quvalağanını ve yarımadanıñ eali terkibini deñiştirgenini köstere.”İşğalci akimiyetniñ işbu cinayetlerine al-azırda Ukraina uquq qorçalav organları tarafından qıymet kesilmeknen bir arada, vekâletleri Rusiye Federatsiyası tarafından tanılğan Avropa mahkemesi de işbu adiselerge uquq ceetten qıymet kesecektir”, – dep izaatlay İnsan aqları boyunca Avropa mahkemesiniñ qararını Ukraina Prezidentiniñ Qırım MC-deki Daimiy Temsilcisiniñ Birinci muavini Darya Svırıdova.
Mitropolit Kliment ”Qırım sesi” haber agentligine bergen intervyusında Ukraina akimiyetine muracaat etmekte: ”İnsan aqları boyunca Avropa mahkemesi Ukrainağa davada üçünci taraf olaraq iştirak etmege teklif ete. Onıñ içün resmiy şekilde Ukraina Ükümetine muracaat etem. ”Ukraina Ortodoks Kilisesi Qırım Yeparhiyasınıñ tarafdarları altı yıl devamında Ukraina akimiyetinden iç bür türlü qol tutuv körmeyip, Qırımda Ukrain kilisesiniñ saqlanıp qalması oğrunda küreşeler. İnsan aqları boyunca Avropa mahkemesi din serbestligi aqqınıñ bozulmasınen bağlı bir sıra meselelerni ilk kere kötere. Onıñ içün, İnsan aqları boyunca Avropa mahkemesi Ukraina Ükümetine bu davada üçünci taraf sıfatında iştirak etip, Ukraina Ortodoks Kilisesi Qırım Yeparhiyasınıñ menfaatlarını qorlaçamağa teklif etkeni munasebetinen Ukraina Ükümetine Ukraina Ortodoks Kilisesi Qırım Yeparhiyası menfaatlarınıñ qorçalanması içün bütün kerekli vesiqalarnı azırlamağa rica etem”, – dep bildirdi mitropolit.
Hatırlatamız ki, 2016 senesinden berli Ukraina Ortodoks Kilisesi Qırım Yeparhiyasınıñ İdaresi Qırımda Ukraina kilisesiniñ tarafdarlarına qarşı yapılğan bütün cinayetler, din serbestligi aqqınıñ bozuluvı aqqında İnsan aqları boyunca Avropa mahkemesini haberdar etti. Anğara köyünde ve Aqyarda 2014 senesi kiliseler zapt etildi. 2017 senesi Yeparhiya İdaresiniñ birinci qatı zapt etildi. Sözde ”Qırım mal-mülk ve topraq munasebetleri nazirligi” Aqmescitteki Volodımır ve Olga knâzları adına kafedral kilisesine qarşı davalar açqan edi. Aqmescit şeer memuriyeti qanunsız şekilde Qırım Yeparhiyası İdaresiniñ kafedral kilisesine ait olğan topraq demetiniñ Aqmescitteki Roma katolik cemiyetine teslim etti. Ve Qırımda Ukraina Ortodoks kilisesi Qırım Yeparhiyasınıñ faaliyetine keder etken çoqtan-çoq başqa bozuluvlar yapılğan edi.