2019 senesi qural ay (mayıs) 23-24 künleri Kıyiv şeerinde ”Tışqı işler Maydanı” ve ”Konrad Adenauyer” Fondları ”İşğal etilgen Qırım: tışqı siyaset ve havfsızlıq siyaseti” konferentsiyasını teşkil etti, tedbirde Ukraina Prezidentniñ Qırım MC Temsilciliginiñ reberiyeti, Ukraina haber siyaseti Nazirligi, Qırımtatar Milliy Meclisi, aq-uquq qorçalayıcıları, Qırım meseleleri boyunca ekspertler ve student-gençler iştirak etti.

Tedbirde Ukraina Prezidentiniñ Qırım MC Daimiy Temsilciniñ Birinci muavini İzet Gdanov «Tışqı işler Maydanınıñ» ekspertlerine faaliyetleri içün minnetdarlıq bildirip, ”Qırımnı işğalden azat etüv oğrunda milliy ve halqara seviyede sanktsiyalar siyaseti” mevzusında maruzasınen çıqışta bulundı.

İzet Gdanov, Qırım ile Donbasnıñ azat etilmelerine qadar Ukraina halqara seviyede muntazam şekilde işğalci memleketke qarşı sanktsiyalar talap etmek, bunıñ tolu derecede ve semereli şekilde yapılması içün işbu saada milliy qanuniyetke deñişmeler kirsetmek ve sanktsiyalar tertibini bozğanlarnı milliy seviyede mesüliyetke çekmek kerek olğanını qayd etti.

Konferentsiya iştirakçilerine cevap berir eken, Birinci muavin Qırım MC ve Aqyar şeerinde icra akimiyet organları olmağan arada Qırım meseleleri boyunca Ukraina akimiyeti organlarınıñ faaliyetini yönetken Temsilcilikniñ vekâletlerini quvetleştirmek kerek olğanını bildirdi.