2018 senesi qural ay (mayıs) 8 künü Ukraina Prezidentiniñ Qırım MC Temsilciliginiñ vekilleri ‘‘İşğal etilgen Qırımda 2018 senesiniñ birinci çeriginde insan aqları bozuluvlarınıñ talili’’ mevzusında matbuat konferentsiyada iştirak ettiler. Tedbirde Qırımtatar Milliy Meclisiniñ azası, Qırımtatar resurs merkezi idaresiniñ başlığı Eskender Bariyev, Qırımtatar resurs merkeziniñ kommunikatsyalar boyunca meneceri Elvir Sagirman, cemaat teşkilatlar, uquq qorçalayıcılar iştirak etti.

Tedbir devamında işğalci akimiyetniñ tintüv, yaqalav, sorğulav ve apis kibi qanunsız areketleriniñ ve adaletli makeme, mütenasip uquqiy yardım, tınç toplaşuvlar, munasip ruhiy ve fizikiy sağlıq seviyesiniñ temin etilüvi kibi esas serbestliklerniñ bozuluvları taqdım etildi ve 2018 senesiniñ birinci çeriginde insan aqları bozuluvlarınıñ ve Qırımda işğalci akimiyetniñ qanunsız areketleriniñ umumiy miqdarı bildirildi.

Eskender Bariyev, 18 tüntüv (olardan 12-si qırımtatarlarğa qarşı), 28 yaqalanuv (14 – qırımtatar), 39 apis (28 qırımtatar), 40 sorğulav (29 – qırımtatar), 339500 ruble miqdarında 14 para cezası (9 – qırımtatar), 170 adaletli makeme aqqınıñ bozuluvı (149 – qırımtatar), 2 tınç toplaşuvlar aqqınıñ bozuluvı kibi statistik malümatlarnen paylaştı.

Çıqışta bulunğanlar qayd etti ki, Qırımnıñ işğalci akimiyeti ve RF mahsus hızmetleri aşırıcılıqnen küreşni manaçıq etip, yarımadada muntazam tarzda insan aqlarını boza ve temel qırımtatar halqına basqısını arttırmağa devam ete.

Körüşüvniñ neticesi olaraq, onıñ iştirakçileri Ukraina ve devletimizniñ halqara ortaqları tarafından Kremlge basqını arttırmağa kerek olğanını qayd ettiler.