2018 senesi saban ayınıñ (mart) 1 künü Ukraina Prezidentiniñ Qırım MC Temsilcilikniñ vekilleri Ukraina Tışqı işler nazirliginiñ yanındaki Gennadiy Udovenko adına Diplomatik akademiyasında olıp keçken ‘‘İşğal etilgen Qırımda qıynavlar: imayesizlik ve cezasızlıq’’ mevzusında haber sessiyasında iştirak ettiler.

Tedbirde Ukrainada akkreditatsiyaları olğan çetel devletlerniñ ve teşkilâtlarnıñ diplomatları, Diplomatik akademiyasınıñ ve Ukraina Tışqı işer nazirliginiñ hadimleri, cemaat teşkilâtlarnıñ, uquq qorçalayıcı birliklerniñ vekilleri ve sabıq siyasi mabüsler iştirak ettiler.

Tedbirniñ çerçivesinde vaqtınca işğal etilgen topraqlarda kütleviy şekilde esas insan aq-uquqları ve serbestlikleri bozulğanı muzakere etildi, Qırımda vatandaşlarğa qarşı qullanğan qıynav çeşitleri aqqında malümat berildi.

Qıynavlardan ve zalımlıqtan semereli qorçalav mehanizmleri yoq olğanı ve Rusiyeniñ Ukraina vatandaşlarnı takip eter eken qıyınlavlarnı qullanğanı qayd etildi. Tedbirniñ iştirakçileri bir kere daa halqara cemiyetni Qırımda insan aq-uquqlarınıñ bozuluvlarında iştirak etken şahıslarğa qarşı şahsiy sanktsiyalarnı işletmege ve 2018 senesi keçirilecek Dünya futbol çempionatında iştirak etmemege çağırdı. Tedbirge bulunğanlar Kremlniñ mabüsleri aqqında filmni seyir ettiler. Temsilcilik öz vekâleti çerçivesinde siyasiy mabüslerge ve olarnıñ qoranta azalarına ertaraflama yardımda bulunmaq, olarnıñ gumanitar meselelerini çezmek, qıta Ukrainada memuriy hızmetlerni bermek içün bütün mümkün olğan çarelerni körgeni qayd etildi. Temsilcilikniñ hadimleri Diplomatik akademiyasında belli amerikalı mütehassıs Devid Garrisniñ ‘‘AQŞ-nıñ tışqı siyaseti ve global liderlik meselesi’’ açıq lektsiyasını da diñlediler.