Bugün qararnen saat 4-ten başlap, aynı vaqıtta bir qaç Ukraina vatandaşları, qırımtatarlarnıñ evlerinde tintüvler keçirildi. Tintüvler Bağçasaray rayonında, Balaqlava ve Aqmescitte yüz berdi. Dört vatandaşımız yaqalanıp, al-azırda işğalci Rusiye Federatsıyasınıñ FSB idaresinde buluna. Olar:
1) Qırımnıñ Bağçasaray rayonında yaşağan Osmanov Ansar İsmail oğlu. ”Qırım birdemliginiñ” faali, taqip etilgen qırımtatarlar, Qırım musulmanlarğa qarşı siyasiy sebeplerden açılğan davalar boyunca mahkeme oturışuvlarına muntazam sürette qatnay edi.
2) Qırımnıñ Aqmescit rayonında yaşağan Abdulvapov Amethan Necip oğlu.
3) Qırımnıñ Qarasuvbazar rayonında yaşağan Mustafayev Marlen Ramis oğlu. ”Qırım birdemliginiñ” faali, 2017 senesi qırımtatarlarnıñ repressiyalarğa oğratılmasına qarşı bir kişilik piketniñ iştirakçisi, Qırımda maküm etilgenlerniñ qorantalarına gönülli olaraq qol tutqan adam.
4) Aqyar şeeriniñ Balaqlava rayonında yaşağan Seytosmanov Ernes Kâzim oğlu. 17 yılğa azatlıqtan marum etilgen siyasiy mabus Enver Seytosmanovnıñ doğmuş ağasıdır.
Abulqat Emil Qurbedinovnıñ bildirgenine köre, ”Tintüvler keçirilgen vaqıtta Qırımdaki bir çoq abulqat, aq qorçalayıcı ve jırnalistlerde mobil telefon bağı çalışmay edi, olarnen bağlanmaq imkânsız edi. Sözde tahqiqat areketleri esnasında mobil telefon bağı aselet çalışmağanı aqqında laf yürsetile”.
Ukraina Prezidentiniñ Qırım Muhtar Cumhuriyetindeki Temsilciligi işğalci RF akimiyetiniñ areketlerini qattı sürette taqbih ete ve vaqtınca işğal etilgen Qırım Muhtar Cumhuriyeti ve Aqyar şeeri topraqlarında Ukraina vatandaşlarınıñ qanunsız şekilde yaqalanmasını ve azatlıqtan marum etilmesini, siyasiy sebeplerge esaslanğan başqa taqip etüvlerni deral toqtatmağa talap ete.
Qırım Muhtar Cumhuriyeti ve Aqyar şeeri Prokuraturası bu munasebet ile kriminal dava açqanını haber etti: https://t.me/prokark/987
Şunı da qayd etmek kerek ki, al-azırda 120-ge yaqın şahıs işğalci devlet tarafından siyasiy sebeplerden azatlıqtan marum etilip, vaqtınca işğal etilgen Qırım Muhtar Cumhuriyeti, Aqyar şeeri topraqlarında ve Rusiye Federatsıyasındaki apishanelerde buluna.