2018 senesi saban ayınıñ (mart) 6 künü Ukraina Prezidentiniñ Qırım MC Daimiy Temsilcisiniñ Birinci muavini ve halqara alâqalar ve uquqiy talil hızmetleriniñ vekilleri Ukraina Maarif ve ilim nazirligi komissiyasınıñ işğal etilgen topraqlardan köçürilgen aliy oquv yurtlarnıñ nezareti boyunca toplaşuvında iştirak ettiler.

Tedbirde Ukraina Maarif ve ilim naziri Liliya Grineviç, Nazirniñ Birinci muavini Volodımır Kovtunets, Nazir muavini Yuriy Raşkeviç, işğal etilgen topraqlardan köçürilgen aliy oquv yurtlarnıñ rektorlarınen rektor muavinleri ve alimler iştirak ettiler. Tedbirniñ çerçivesinde vaqtınca işğal etilgen topraqlardan köcürilgen aliy oquv yurtlarnıñ nezareti boyunca komissiyanıñ faaliyetine yekün çekildi ve işbu yurtlarnıñ faaliyetini mükemmelleştirmek maqsadınen tavsiyeler azırlandı.

Köçürilgen aliy oquv yurtlarında oquv ceryanını teşkil etüv, olarnı metodik ceeten temin etüv, oquv ceryanını kadrlarınen ve maddiy-tehnikiy ceetten temin etüv meseleleri muzakere etildi. Oturış devamında Daimiy Temsilciniñ Birinci muavini Qırımdan memleket içinde köçken şahıslarnıñ tasil aqlarına riayet etüvde mevcüt olğan problemalarnı tarif etti. Temsilcilik köçürilgen aliy oquv yurtlarnıñ faaliyetleriniñ mükemmeleştirilüvi, vaqtınca işğal etilgen topraqlarda yaşağan abituriyentlerge kiriş kampaniyası, kerek olğan vesiqalar ve imtiyazlı yerlerniñ miqdarı aqqında haber etilmesi boyunca öz tekliflerini taqdim etti.