2018 senesi saban ayı (mart) 27 künü Ukraina Prezidentiniñ Qırım MC Daimiy Temsilci Borıs Babin ve Temsilcilikte halqara alâqalar ve uquqiy talil hızmetleriniñ baş mesleatçıları ‘‘İşğal etilgen topraqları boyunca Ukrainanıñ devlet siyasetiniñ istiqbali’’ mevzusunda halqara konferentsiyada iştirak ettiler.
Konferentsiya devamında Qırımtatar Milliy Meclisiniñ reisi Refat Çubarov, Ukraina infrastruktura naziri Volodımır Omelân, davalarnıñ ögüni aluv ve evelden haberdar etüv Merkeziniñ Prezidenti Yulian Kifu, ‘‘Chatham House’’ Halqara alâqalar Kral institutınıñ yardımcı hadimi Ceyms Şerr, ‘‘Tısqı işler meydanı’’ fondunıñ ekspertleri, başqa ukrain ve halqara ekspertler, devlet ve cemaat erbapları çıqışta bulundılar.
Temsilcilikniñ qol tutuvı ile keçirilgen ‘‘İşğal etilgen toraqları boyunca Ukrainanıñ devlet siyasetiniñ istiqbali’’ mevzusunda konferentsiyanıñ başında ‘‘Tısqı işler meydanı’’ fondunıñ ekspertleri tarafından yazılğan ‘‘Zapt etilgen Qırım 2014-2017 seneleri devamında abluka ve sanktsiyalar şaraitlerinde’’ kitap taqdim etildi.
Konferentsiya devamında sanktsiyalarğa riayet etüv, vaqtınca işğal etilgen topraqlarnen infrastruktura alâqalarnı temin etüv, Qırımnıñ kelecekteki qurumı, Ukrainanıñ işğal etilgen topraqlarına nisbeten içki siyaseti, işğal etilgen topraqlarnıñ Ukrainanıñ energetik saasına tesiri, Ukrainada memleket içinde mecburen köçken şahıslarnıñ insan aqlarını ve anayasal aqlarını ğayrıdan tiklev, Qara deñiz regionında havfsızlıq meselesi, Ukraina ile Rusiye arasındaki gibrid cenk, onıñ şaraitinde bükülicilik ve içtimaiy birlik ve Qırımnıñ işğalden azat etilüviniñ arbiy ceetleri kibi meseleler muzakere etildi.
Borıs Babin öz çıqışında Temsilcilikniñ yuqarıda qayd etilgen yönelişlerde kündelik faaliyeti aqqında malümat berip, mevcut olğan problemalarnı da qayd etti. Daimiy Temsilci akimiyet organlarnıñ Qırımnıñ işğalden azat etilüvi ve ğayrıdan integratsiyası oğrunda areketlerini doğrultuv ve planlaştırma meselesini tafsilâtlı şekilde aydınlattı, bu cümleden, Ukrainanıñ vaqtınca işğal etilgen Qırım toprağından istilânıñ devam etmesine qarşılıq kösterüvi, Qırımda Ukraina devletiniñ, uquqiy şahıslarınıñ ve vatandaşlarınıñ aq-uquqlarınıñ qorçalavı boyunca 2018-2019 seneleri içün acele areket Planınen tanıştırdı.