2018 senesi (fevral) kiçik aynıñ 26 künü Ukraina Prezidentiniñ Qırım MC-de Daimiy Temsilcisi Borıs Babin ve Temsilcilikniñ halqara alâqalar ve uquqiy talil hızmetleriniñ vekilleri ‘‘İşğal etilgen yarımada: qarşılıq kösterüvniñ 4-nci yıldönümi’’ halqara forumında iştirak ettiler.
Oturışta Ukraina Baş naziriniñ Birinci muavini, Ukraina Yuqarı Şurası reisiniñ Birinci muavini, Qırımtatar halqı Milliy Meclis reisi, Ukraina Prezidenti memuriyetiniñ reis muavini, Avropa Şurasınıñ Almaniyadan deputatı, AQŞ-nıñ Ukrainada fevqulâde ve salahiyetli elçisi, Şimaliy Atlantik Añlaşması Teşkilâtınıñ (NATO) Ukrainadaki ofisiniñ müdir muavini, Kanadanıñ Ukrainada fevqulâde ve salahiyetli elçisi, Türkiye Cümhuriyetiniñ Ukrainada fevqulâde ve salahiyetli elçisi, BMT İnsan aq-uquqları boyunca nezaret missiyasınıñ reberi, Ukraina haber siyaseti Naziri, Memleket içinde mecburen köçken şahıslarnıñ aq-uquqlarına riayet etüv meseleleri boyunca vekâletliniñ temsilcisi, Vaqtınca işğal etilgen topraqlarlarnıñ ve memleket içinde mecburen köçken şahıslarnıñ meseleleri boyunca Nazirniñ Birinci muavini, Ukraina medeniyet Naziriniñ Birinci muavini, Ukraina maarif ve ilim Naziriniñ Birinci muavini, Ukraina mudafaa Naziriniñ avropa integratsiyası boyunca Muavini, Qırım MC Savcınıñ Birinci muavini, Ukraina Tış işler Naziriniñ Muavini, merkeziy icra akimiyetniñ başqa vekilleri ve cemaat teşkilâtlarınıñ azaları iştirak etti.
Tedbir panel muzakeresi şekilinde keçirildi. I-nci panel Ukraina devlet akimiyetiniñ 2014-2018 seneleri devamında Qırım boyunca siyasetine bağışlandı, II-nci panelni Qırımnıñ işğal etilüvini qabul etmegen halqara cemiyetini temsil etken çetel vekilleri taqdim etti. Munaqaşa devamında Qırımnı işğalden azat etülüvi boyunca halqara platformanı teşkil etmege kerek olğanı qayd etildi. ‘‘İşğal etilgen azatlıq aqqı’’ mevzusında soñki panelde Qırımda qarşılıq kösterüv vastaları ve insan aq-uquqlarınıñ qorçalavı muzakere etildi.
Bundan da ğayrı, halqara forum çerçivesinde vaqtınca işğal etilgen topraqlarda ealiniñ zorbalıqnen deñiştirilüvi, zorbalıqnen pasportlaşması, qırımlılar içün uzaqtan tasil alma imkânları, Qırım MC-de medeniy asabalıqnıñ yoq etilüvi ve kütleviy şekilde arheologik qazmalarınıñ keçirilüvi muzakere etildi. Daimiy Temsilci Temsilcilik tarafından rusiye istilâsına qarşılıq köstermek içün daimiy şekilde yapılğan areketler aqqında malümat berdi. Temsilcilik vaqtınca işğal etilgen topraqlarda yaşamağa devam etken ya da memleket içinde mecburen köçken Ukraina vatandaşlarınıñ aq-uqularına riayet etilmesi içün qolundan kelgenini yapa, gumanitar meseleleriniñ çezilüvinde, Ukrainanıñ nezareti altında bulunğan topraqlarda olarğa memuriy hızmetlerniñ berilüvinde er türlü yardım köstere.
Bundan da ğayrı, Ukrainanıñ vaqtınca işğal etilgen Qırım toprağından rusiye işğaliniñ devam etmesine qarşılıq kösterüv, Qırımda Ukraina devletiniñ, uquqiy şahıslarnıñ ve vatandaşlarınıñ menfaatlarınıñ qorçalanması boyunca acele plan ve Qırımnıñ işgalden azat etilüviden soñ amelge keçirilecek tedbirlerniñ kompleksini teşkil etken Qırımnıñ ğayrıdan integratsiyası boyunca strategiya azırlanmaqta.