2018 senesi saban ayınıñ (mart) 19 künü Ukraina Prezidenti Petro Poroşenko rusiye işğalci memuriyeti vaqtınca işğal etilgen Qırımda keçirgen sözde ‘‘RF prezidenti saylavlarını’’ Rusiye tarafından halqara uquqnıñ nevbetteki bozuluvı dep adlandırdı ve ciddiy basqığa baqmadan bu temaşada iştirak etmegen Qırım sakinlerine teşekkür etti.

Prezidentniñ aytqanlarına köre, ne de saylavcılarnıñ qayd etilgen iştiragi, ne de saylavlarnıñ uydurılğan neticeleri yarımadanıñ sakinleriniñ kerçek areketlerini aks etmey. Beyan etilgen resmiy ‘‘neticeler’’ yalandan başqa şey değil. Ve bu sahte neticelerni Kreml yalıñız Ukrainağa qarşı degil, bütün dünyağa qarşı alıp barğan gidrid haber cenkinde işletecek. Qanunsız saylavlarnıñ neticeleri emiyetsiz ve iç bir türlü uquqiy neticelerge ketirmez. Qırımda qanuniy şekilde yalıñız Ukraina Prezidenti saylavları keçirile bilir. Kremlniñ işğalini ve ilhaqını qanunlaştırmaq ıntıluvları bütünley muvafaqiyetsizdir.

Petro Poroşenko qanunsız saylavlarnıñ arfesinde saylavlarnıñ beyan etilgen noqtaiy-nazarları içün halqara ortaqlarına teşekkür etti. Olar saylavlarnıñ neticelerini qabul etmeyceklerini ve Qırımnı Ukrainanıñ ayırılmaz qısımı olaraq sayğanlarını ilân ettiler.

Ukraina Prezidenti Qırımda işğlaci akimiyet tarafından insan aq-uquqlarınıñ  bozuluvını toqtatmaq maqsadınen halqara teşkilâtlar ve makemeler çerçivesinde areketler quvetleştirilecegini vade etti. Ukraina yarımadada ve rusiye apishanelerinde bulunğan bütün ukrainalı siyasiy mabüslerini azat etilüvi içün küreşini de devam etecek.

‘‘Bu arsız saylav ceryanını planlaştırğan, teşkil ve teşviq etken bütün şahıslarnıñ cedvelini tertip etip, işğalci rusiye akimiyetine qarşı sanktsiyalarnı quvetleştirmek içün taqdim etmelimiz’’, – dep qayd etti Devlet başlığı.

Petro Poroşenko halqara ortaqlarını Kremlge sanktsiyalar şekilinde başqını quvetleştirmege çağırdı. Ve bunıñ sebebi – yalıñız Rusiyeniñ Ukrainağa qarşı tecavüzi degil, bütün avropalı ve avropa-atlantik cemiyetine qarşı gibrid cenki, çetelde siyasiy öldürüvler ve Rusiyeniñ özünde demokratiyanıñ boğulmasıdır.

‘‘Beraberlikte yapılğan areketlerimiz, birligimiz ve halqara birdemlik Qırımnıñ işgalden azat etilüvini temin eter ve Ukrainanıñ egemenligininen territorial bütünligini, halqara uquqa riayet etüvni ğayrıdan tikler!’’, – dep qayd etti Ukraina Prezidenti.