2018 senesi arman ayı (avgust) 31 künü istilâci devletke qarşı Ukraina tarafından açılğan davanı 1982 senesi Deñiz uquqı BMT Konventsiyasına binaen baqqan Tribunal öz protsesual emirini beyan etti. Bu emirge binaen Tribunal ilk-evelâ RF tarafından ilân etilgen vekâletlernen bağlı itirazlar boyunca qararlarnı çıqaracaq.
Bundan evel 2018 kiçik ay (fevral) 19 künü Ukraina Tribunalğa Qara ve Azaq deñizleri ve Keriç boğazı boyunca (Ukraina RF-na qarşı) Memorandumını taqdim etken edi. Memorandumda, Rysiye Qara ile Azaq deñizlerinde ve Keriç boğazında Ukrainanıñ qanuniy aqlarını bozğanı tasdıq etile. Ukrain Memorandum Rusiye qanunsız alda Ukrainanı 2014 senesi yalı boyunda yerleşken devletiniñ aqlarından marum etkenini, Ukrainanıñ resurslarını öz maqsatlarına işletkenini ve işletmege devam etkenini, Ukrainanıñ yalı boyunda yerleşken rayonlarını idare etmek aqqından marum qaldırğanını beyan ete. Halqara uquqnı bozğan Rusiye, başqa cinayetlernen bir arada, Ukrainanıñ balıq ve diger resurslarını tükete, ukrain balıqçılarına zarar ketire ve ukrain limanlarına alıp barğan yollarnı tösmenge ala. Ukrainanıñ davası boyunca cevap bermek yerine, istilâci devlet 2018 senesi qural ay (mayıs) 22 künü Tribunalnıñ vekâletleri boyunca öz itirazlarını bildirdi.
Ukraina çetel işler Nazirligi 2018 senesi oraq (iyül) 31 künü ilân etken beyanatta Tribunalda Ukraina Qırım üzerinde öz egemenligini tasdıqlamaq istey değen RF-nıñ iddialarnı red etti, çünki Ukrainanıñ Qırım MC ve Aqyar şeeri üzerindeki egemenlikniñ tasdıqlanmasına içtiyaç bile yoq – bu egemenlik umumen alğanda halqara cemiyet tarafından tolusınen qabul etile ve BMT Baş Assambleyası tarafından tasdıq etildi.
Ukraina çetel işler Nazirligi Azaq deñizi ve Keriç boğazı üzerinde 1982 senesi qabul etilgen Konventsiya üküm sürmegeni aqqında Rusiyeniñ iddialarını da red etti, cünki em Ukraina, em de Rusiye bu yerlerni ‘‘umumiy içki suvlar’’ olaraq saymağa añlaşqan ediler. Ama RF tarafından qanunsız alda Azaq deñizinde ukrain gaz menbalarnıñ zapt etilüvi, Keriç boğazı üzerinde bir taraflama şekilde köpürniñ ve başqa yapılarnıñ quruluvı, RF tarafından boğazdan keçecek gemilerniñ büyüklügini sıñırlanması Rusiyeniñ Azaq deñizi ile Keriç boğazı üzerinde Ukraina ile umumiy egemenlikke saip oluv aqqında iddialarına zıt kele. Ukraina çetel işler Nazirligi deñiz saasında halqara uquqnı qaba şekilde bozğan istilâcı devlet mıtlaqa mesüliyetke çekilecegini vade etti.