2019 senesi saban (mart) ayı 15 künü Ukraina Prezidentiniñ Qırım MC-deki Daimiy Temsilciniñ Birinci muavini İzet Gdanov Kıyiv şeerinde İsveciya Qırallığınıñ Ukrainada Fevqulâde ve Vekâletli Elçisi Martin Hagström ile iş körüşüvini keçirip, çetel diplomatik idareniñ vekilini vaqtınca işğal etilgen Qırımda yaşağan ve yarımadadan memleket içinde köçken vatandaşlarnıñ qanuniy menfaatlarını qorçalav boyunca Temsilcilikniñ faaliyeti ile tanış etti.

Vaqtınca işğal etilgen Qırımnı ziyaret etken çetel devletlerniñ vatandaşları Ukraina qanuniyetini bozğanına ve çetel uquqiy şahıslarnıñ yarımada ile bağlı sanktsion tertibine riayet etmemelerine diqqat etildi. Bu munasebet ile yarımadağa gumanitar meselelerni çezmek niyetinen kelgen ecnebiyler Qırım ile memuriy sıñırnı qanuniy yolnen keçe bilgenleri aqqında İsveçiya vekillerine haber etildi.

Bundan da ğayrı, işğalci memleketke iqtisadiy saada sanktsion basqını arttıruv ve muim yönelişlerniñ inkişafı, bu cümleden Qırım mevzusını aydınlatqan ukrain matbuat vastalarına qol tutuv olaraq İsveçiya tarafından Ukrainağa halqara tehnikiy yardımnı berüv imkâniyeti semereli şekilde muzakere etildi.

Qırım yarımadasını işğalden azat etüv, vatandaşlarnıñ aq-uquqlarını ve serbestliklerini qorçav, işğal etilgen Qırımda yerli ealige qol tutuv saasında Qırımtatar Milliy Meclisiniñ emiyeti ayrıca muzakere etildi.

Taraflar Qırım yarımadası ile bağlı meseleler boyunca kelecekte işbirlik ve qarşılıqlı qol tutuv aqqında añlaştılar.