Temsilcilik açıq menbalardan 2021 senesiniñ qural ayı devamında Kıyiv, Odesa, Harkiv ve Dnipro şeerlerinde çıqışta bulunmağa niyetlengen rusiyeli şaqacı artist İvan Abramovnıñ Ukrainada gastrolleri aqqında haber aldı.
Nezaret etüv neticelerine binaen Temsilcilikke belli olğanı kibi, Ukraina Nazirler Şurası 2015 senesi ilk yaz ayınıñ 4-de qabul etken 367 sanlı Qarar ile vaqtınca işğal etilgen yarımada ile memuriy sıñırdan keçüv tertibini bozğan Abramov 2019 senesiniñ arman ayında qanunsız şekilde vaqtınca işğal etilgen Qırım Muhtar Cumhuriyetini ziyaret etken edi.
Açıq menbalarda Aqmescit şeerinde İvan Abramovnıñ kontserti 2019 senesi arman ayınıñ 11-de sözde ”Qırım Cumhuriyeti devlet akademik muzıka teatrinde” keçkeni aqqında malümatlar mevcüttır.
2019 senesi Abramov vaqtınca işğal etilgen Qırımnı ziyaret etkende, memuriy sıñırnı keçüv qaidelerini bozğanı aqqında Temsilcilik Ukraina Devlet sıñır hızmetini ve Ukraina havfsızlıq Hızmetini haberdar etti ve işbu malümatnı diqqatqa alıp, sıñır nezaretini bozğan Abramovğa qarşı mütenasip tedbirlerniñ alınmasını rica etti.