Qırım mevzusı ukrain matbuat vastalarında tolu derecede aks etilmey, malzemelerde terenlik ve keyfiyet ceetinden nuqsanlıqlar bar, onıñ içün işğalni aydınlatqan jurnalistlerniñ işğal etilgen yarımadada malümat toplamağa devam etmeleri, işançlı menbalarnen qullanmaları ve doğru sözlernen vaqialarnı ifade etmeleri pek müimdir.
Bu aqta oraq (iyül) ayı 9 künü Kıyiv şeerindeki ”Ukrinform” agentliginde keçirilgen ”Qırım matbuat vastalarınıñ küzgüsinde” servlevalı tögerek masada bildirildi.
ZMİNA. İnsan aqları merkeziniñ idare başlığı Tetâna Peçonçıknıñ fikirince, ukrain matbuat vastalarınıñ Qırımdan unikal haberler almağa devam etmeleri, başqa menbalardan malümatlarnı qullanğanda ise, haberlerni diqqatnen teşkermeleri müimdir. ”Yazıqlar olsun ki, Qırım mevzusı terenden aydınlatılmay, andan keyfiyetli malümat almaq içün ğayretlerimizni sart etmelimiz”, – dep tüşüne o. – Bundan ğayrı, biz daimiy şekilde jurnalistlerniñ bilgileri, añlamaları zayıf olğan noqtalarnı, misal olaraq, işğal mevzusı nasıl sözler yardımınen tasvir etilecegini, halqara gumanitar uquqnıñ esas şartlarını qayd etemiz”.
Bu maqsadnen ZMİNA, Qırım aq qorçalav gruppası Ukraina Prezidentiniñ Qırım Muhtar Cumhuriyetindeki Temsilciligi ile beraber sual ve cevaplardan ibaret olğan ”İşğal munasebetinen Qırım” serlevalı qullanmanı azırladılar.
Ukraina Prezidentiniñ Qırım Muhtar Cumhuriyetindeki Daimiy Temsilcisiniñ Birinci muavini Darya Svırıdovanıñ aytqanlarına köre, qullanmanı azırlamaq fikiri diger akimiyet organlarınen ve jurnalistlernen qonuşmalardan soñ peyda oldı: ”Coq allarda em Qırım işğali ile bağlı vaziyetni, em de bu meselenen bağlı ayrı terminlerni yañlış añlağanlarını kördik. Qullanmada eñ sıq soralğan suallerge cevaplar bermege ya da Qırım yarımadasınıñ vaqtınca işğal etilmesi munasebetinen peyda olğan yalanlarnı aydınlatmağa tırıştıq”.
Qullanmada, şu cümleden, ”ilhaq” yerine ”işğal” sözüniñ işletilmesi müim olğanı, Qırımda işğalnen beraber çalışmağa başlağan ”akimiyet organları” nasıl adlandırılacağı, ukrain ve çetel jurnalistleri qanuniy şekilde Qırımğa nasıl kele bilgenleri ve başqa bir çoq meseleler aqqında söz yürsetile. ”Bundan ğayrı, Qırım yarımadası ile qıta Ukraina arasında sıñırnıñ olmağanını, Qırım sakinleriniñ Ukraina vatandaşları olmağa devam etkenlerini, olarğa berilgen pasportlarnıñ kâğıt parçası olğanını hatırlattıq”, – dep qoştu Svırıdova.
Qullanmanı işbu adres boyunca yüklemege mümkün: https://zmina.ua/content/uploads/sites/2/2020/07/crimeaqa_web-1.pdf