Ukraina Prezidenti Volodımır Zelenskiy vaqtınca işğal etilgen Qırım ukrain akimiyetniñ nezareti altına qaytacağına eminlik bildirdi. Bu aqta o, Türkiyege resmiy ziyareti çerçivesinde Türkiye Cumhuriyetindeki ukrain ve qırımtatar cemiyetlerinen körüşken arada ayttı.

”Bunı bilem ki, кün kelir, Qırım Ukrainağa qaytar ve bölüngen qırımtatar horantaları bir masa etrafında toplanır. Ve ”Ey, güzel Qırım” yırı yalıñız keçmişte halqıñıznıñ başına tüşken ağır sınavlar aqqında hatırlatır. Kelecekte onıñ tarihında tek bahtlı tañlar atar”, – dep qayd etti Devlet başlığı.

Ukraina Prezidenti hatırlatqanı kibi, 75 yıl evelsi sovet rejimi deşetli cinayetni kerçekleştirdi – qırımtatarlarnı yarımadalarından sürgün etti. 2014 senesi ise bu belâ tekrarlandı. Bügün 21 asırındaki Rusiye rezaletli cezalavlar yapıp, Qırım toprağına kene de acı ve dert ketire.

”Bir çoq qırımtatar kene de öz evlerini terk etmege mecbur. Qalğanlar ise yaqalavlarğa, tintüvlerge ve devamlı cezalavlarğa oğray, mayıs 18 künü mitinglerniñ keçirilüvi ve sürgünlik qurbanlarınıñ añılması yasaq etile, yerli akimiyetniñ nutuqlarında ve matbuat vastalarında ”tatarlar” dep, ”Qırım” sözüni aselet qoşmaylar, böyleliknen halqıñıznı ve milliy mensübiyetiñizni körmemezlikke uralar”, – dep qayd etti o.