2018 senesi (fevral) kiçik aynıñ 26 künü Ukraina Prezidentiniñ Qırım MC-de Daimiy Temsilcisi Borıs Babin ve Temsilcilikniñ halqara alâqalar ve uquqiy talil hızmetleriniñ vekilleri Kyiv şeerindeki Mustaqillik meydanında vaqtınca işğal etilgen Qırımda yaşap, öz menligini saqlap qalğan ve Ukrainağa sadıq qalğan qırımtatar halqı, ukrainalılar ve diger millet vekilleri ile Birdemlikke bağışlanğan mitingte iştirak ettiler.

Tedbirde Qırımtatar halqı Milliy Meclisiniñ reisi ve onıñ muavinleri, halq deputatlar ve cemaat faalcileri iştirak ettiler. Merasimniñ iştirakçileri rusiye işğalcileri tarafından ölderilgen, zorbalıqnen hırsızlanğan Ukraina vatandaşlarınıñ ve işğalciniñ reinelerine çevirilgen siyasiy mabüslerni añdılar. Miting vaqıtında 2014 senesi kiçik aynıñ 26-da olıp keçken vaqialar video vastasınen kösterildi. Malüm olğanı kibi, 2014 senesi kiçik aynıñ 26 künü 15 biñge yaqın qırımtatar, ukrainalı ve diger millet vekilleri Qırımtatar halqı Milliy Meclisiniñ çağıruvına Qırım MC Yuqarı Şurasınıñ yanına kelip, Rusiyege qol tutqan deputatlarğa Qırımnı Ukrainadan ayırğan qanunsız qararnı qabul etmege bermediler.

2014 senesi kiçik aynıñ 26-da Qırımnıñ vatandaşlıq cemaatı tınç ve uquqiy vastalarnı qullanıp, Ukrainanıñ territorial bütünligini qorçaladı, Rusiyege ve onıñ agentlerine Qırımnı Rusiye terkibine sözde öz isteginen ‘‘keçkenini’’ numayış etecek nevbetten tış sessiyanı keçirmege bermedi. Onıñ içün fevral 26 künü Qırımnıñ qarşılıq kösterüv künü oldı. Qırım sakinleriniñ kütleviy şekilde qarşılıq kösterüvi, yazıqlar olsun ki, Qırımnıñ vaqtınca işğalini toqtatıp olamadı, bu vaziyet 4 sene devam ete. Qırımnıñ temel qırımtatar halqı, ukrainalılar, başqa millet vekilleri işğalcilerniñ reineleri oldı. Olar öz menliklerini saqlap, bizden yardım bekleyler, Ukrainağa işanalar ve devletimiz halqara seviyede tanılğan sıñırlarda öz territorial bütünligini tikleycegine ümüt eteler.