2018 senesi ekim (oktâbr) ayı 3 künü Ukraina Prezidentiniñ Qırım MC Daimiy Temsilcisi Borıs Babin Yañı Şarqiy Avropa (Nowa Europa Wschodnia), Lehistanlı The Times (PolskaTheTimes), TVN 24 telekanalı, Lehistan televizionı (Telewizja Polska), Lehistan radiosı – haber radio agentligi (Polskie Radio – Informacyjna Agencja Radiowa), Lehistan matbuat agentligi (Polish Press Agency) ve diger belli Lehistan matbuat vastalarınıñ vekilleri ile körüşti.

Borıs Babin Temsilcilikniñ kündelik faaliyetini tarif etti ve Lehistan Cumhuriyetiniñ parlamentine ve ükümetine Ukrainanıñ topraq bütünligine qol tutqanı ve Qırım yarımadasını ilhaq etmek teşebbüsini tanımağanı içün öz minnetdarlığını bildirldi.

Munaqaşa esnasında Daimiy Temsilci rusiye işğalci akimiyetiniñ vekilleri Qırımda sözde ‘‘milliy-medeniy’’ azeriy, bulğar, ermeni, yunan, gürci, eston, yeudi, alman muhtariyetlerini teşkil etip, olarnı yuqarıda qayd etilgen ve Ukrainanıñ başqa milliy azınlıqlarnı ruslaştırmaq ve bu milletlerge soydaş olğan devletlerge basqı yapmaq, Qırımdaki vaqıalar aqqında halqara teşkilâtlarğa yañlış malümat bermek içün qullanğanını bildirdi.

Borıs Babin Qırım yarımadasınıñ vaqtınca işğali şaraitlerinde etnik ukrainalılarnıñ, Qırımnıñ tamır halqı olğan qırımtatarlarnıñ ve milliy azınlıqlarnıñ aq-uquqlarını temin etmek ve qorçalamaq kerek olğanını qayd etti, Qırımda serbestlik ve şahsiy toqunmamazlıq, adaletli mahkeme, tasil ve din serbestligi kibi esas insan aqları işğalci akimiyet tarafından muntazam şekilde bozulğanını hatırlattı. Qırım yarımadasınıñ üzerinde qapatılğan ava boşluğını ve ‘‘Simferopol’’ ava limanını işletken rusiye ava şirketleriniñ qanunsız faaliyetini, Qırım etrafındaki deñiz suvlarında qanunsız gemicilikniñ teşkil etilüvini ve yarımadada Ukraina deñiz limanlarınıñ qanunsız alda işetilüvini toqtatmaq içün semereli vastalarnı qullanmaq kerek olğanını qayd etti.

Daimiy Temsilci RF akimiyet tarafından Azaq deñizinde ticariy gemicilik boyunca halqara uquq muntazam şekilde bozulğanını aydınlattı, bu cümleden RF mahsus havfsızlıq Hızmeti qanunsız alda çetel bayraqlar altında yaldağan gemilerni olar Berdânsk ve Mariupol limanlarına areket etip, Keriç boğazından keçken arada toqtatqanını ve teşkergenini bildirdi.

Borıs Babin Qırımda şimdiki ekologik vaziyet aqqında ikâye etti ve işğalci akimiyetniñ özek ve naqliyat infraterkibi saasında faaliyeti aqqında bildirdi.