Ukraina Prezidentiniñ Qırım MC Daimiy Temsilcisiniñ Birinci muavini İzet Gdanov, Litva Cumhuriyeti Seyminiñ spikeri Viktoras Pranckietis reberligindeki eyet, Qırımtatar halqı Milliy Meclis reisi Refat Çubarov ve Herson vilâyetiniñ reberiyeti vaqtınca işğal etilgen Qırım yarımadasınen memuriy sıñırnı ziyaret ettiler.

Daimiy Temsilcisiniñ Birinci muavini Litva eyetine devletleriniñ Qırım işğali boyunca izçen siyaseti ve ukrain ve qırımtatar halqlarına ertaraflı qol tutuvı içün teşekkür etti.

İzet Gdanov qayd etkenine köre, halqara cemiyetke Qırımnıñ işğalini unuttırmaq içün iştilâci memleket Donbassta mahsus cenkni başladı.

Litva siyasetçisi öz nevbette Litva iç bir vaqıt Qırımnıñ Rusiye tarafından işğalini qabul etmeycegini beyan etti. Vaqtınca işğal etilgen Qırım yarımadasınen memuriy sıñırında Litva Cumhuriyetiniñ bayrağını açıp, duşmanğa Ukrainanıñ aqları Avropa Birligi seviyesinde qorçalanğanını numayış ettiler.

Bundan soñ İzet Gdanov musulmanlarnı Qurban bayram ile hayırladı ve ziyarette bulunğanlarnen beraber Novooleksiyvka Medeniyet eviniñ yanındaki bayram tedbirlerinde iştirak etti.