2018 senesi boş ay (noyabr) 23 künü Temsilcilikteki halqara alâqalar hızmetiniñ reisi Yevgen Samuha Ukrainada Mustaqil Malta Ordeni Elçiliginiñ daveti ile memleketlerimiz arasındaki diplomatik munasebetlerniñ 10-yıllığına bağışlanğan ‘‘Mustaqil Malta Ordeni ve Ukraina – diplomatik munasebetleriniñ 10 yıllığı, muhtaclarğa hızmet etüvniñ 27 yıllığı’’ serlevalı resimli neşirniñ taqdiminde iştirak etti.

Kitapta, 1991 senesinden başlap, Mustaqil Malta Ordeniniñ Ukrainada faaliyeti, Ukrainağa yardım boyunca Malta hızmetiniñ teşkil etilüvi, 2008 senesi diplomatik munasebetlerniñ quruluvı, ondan soñraki devirde Ukraina ile Orden arasında yüksek seviyede körüşüvler tasvirlendi.

Tedbir çetel temsilciliklerge hızmet etüv boyunca Baş müdirliginiñ matbuat merkezinde Ukrainada Mustaqil Malta Ordeniniñ Fevqulâde ve Vekâletli Elçisi Antonio Gazzanti Pulyeze di Kotrone, BMT qaçaqlar işleri boyunca Yuqarı Komissar İdaresiniñ vekili Pablo Mateu, Ukrainağa yardım boyunca Malta hızmetiniñ reisi Pavel Titka, yerli ve çetel diplomatlarnıñ iştiragi ile olıp keçti.

Antonio Gazzanti Pulyeze di Kotrone Temsilicik adına şahsen kitapnı imzalağan arada Yevgen Samuha Fevqulâde ve Vekâletli Elçige, devleti Ukrainanıñ topraq bütünligine ve egemenligine qol tutqanı içün öz minnetdarlığını bildirip, Ukrainağa yardım boyunca Malta hızmetiniñ faaliyetini vaqtınca işğal etilgen Qırımdan köçken şahıslarğa da kenişletmege teklif etti.