2018 senesi çiçek ayı (aprel) 18 künü Ukraina Prezidentiniñ Qırım MC Daimiy Temsilcisi Borıs Babin, onıñ Birinci muavini İzet Gdanov, Temsilcilikte halqara alâqalar ve uquqiy talil hızmetleriniñ vekilleri ‘‘Memleket içinde köçken şahıslarnıñ ve Ukrainanıñ vaqtınca işğal etilgen topraqlarda yaşağan vatandaşlarnıñ aq-uquqlarınıñ qorçalavı, reinelerniñ azat etilüvi ve olarnıñ aqlarınıñ ğayrıdan tiklevi boyunca Milliy strategiyanıñ yerine ketirüv vaziyeti’’ komitet diñlevlerinde iştirak ettiler.
Oturışta Ukraina halq deputatları, insan aq-uquqları boyunca Komitetniñ azaları, Ukraina Yuqarı Şurasınıñ yanında İnsan aqları boyunca vekâletlisi, mütenasip Nazirliklerniñ Nazir muavinleri, Donetsk ve Lugansk vilâyetleri devlet memuriyetleriniñ, ilmiy müessiselerniñ, halqara ve cemaat teşkilâtlarnıñ vekilleri iştirak ettiler.
Oturış devamında memleket içinde köçken şahıslarnıñ ve Ukrainanıñ vaqtınca işğal etilgen topraqlarda yaşağan vatandaşlarnıñ aq-uquqlarınıñ qorçalavı, reinelerniñ azat etilüvi ve olarnıñ aqlarınıñ ğayrıdan tiklevi boyunca Milliy strategiyanıñ keyfiyetsiz yerine ketirilüviniñ sebepleri muzakere etildi.
Bundan da ğayrı, memleket içinde köçken şahıslarnıñ tasil, saylav, içtimaiy-iqtisadiy aqlarınıñ ayrı tarafları, ameldeki qanuniyetke deñişmelerniñ kirsetilüvi ve memleket içinde köçken şahıslarnıñ ayrı aqlarını idare etken qanunlarnıñ (№ 6240 ve № 6692 qanun leyhaları) muzakere etildi. ‘‘Qırım serbest iqtisadiy saasınıñ teşkil etilüvi ve Ukrainanıñ vaqtınca işğal etilgen topraqlarında iqtisadiy faaliyetniñ hususiyetleri aqqında’’ Ukraina qanunınıñ maddelerine ayrıca diqqat etildi.
Daimiy Temsilci öz çıqışında Qırımdan memleket içinde köçken şahıslarnıñ tasil, tıbbiy ve iqtisadiy-içtimaiy aqlarına riayet etüvde mevcut olğan problemalarnı ve olarnıñ çezilüv yollarını qayd etti. Qırımda yaşağan Ukraina vatandaşları ve siyasiy mabüsleriniñ qoranta azaları içün pasport vesiqalarınıñ resmiyleştirilüvi, Qırımğa yaqın olğan rayonlarda Memuriy hızmet merkezleriniñ teşkil etilüvi ve donatıluvı, vaqtınca işğal etilgen Qırımnıñ sıñırına yaqın olğan rayonlarğa demiryol naqliyatınıñ ve KÇNN-na qadar qanuniy avtomobil taşımalarınıñ teşkil etilüvi aqqında malümat berildi. KÇNN-nı minimal seviyede abadanlaştırmaq ve memleket içinde köçken şahıslarnıñ ilk nevbetteki mesken problemalarını çezmek içün olarnıñ verifikatsiyasını yapmaq kerek olğana diqqat etildi.