2018 senesi boş ay (noyabr) 22 künü 2018 senesi boş ay (noyabr) 22 künü Temsilcilikteki uquqiy talil hızmetiniñ reisi Anatoliy Çehun ve vaqtınca işğal etilgen topraqlardan köçken vatandaşlarnen çalışqan hızmetniñ baş mesleatçısı Olena Netrebiç memleket içinde köçken şahıslarnıñ aq-uquqlarına riayet etüv boyunca qanuniyetni mükemmelleştirüvge bağışlanıp, Odesa şeerinde keçirilgen içtimaiy qoruv organları temsilcileriniñ Regionlar arası körüşüvinde iştirak ettiler.
Körüşüvni BMT Qaçaqlar işleri Yuqarı Komissarı idaresiniñ (QIYKI) qol tutuvı ile ”Memleket içinde köçken şahıslarğa uquqiy yardım ve Ukraina Cenübindeki cemiyetlerniñ imkânlarını kenişletüv” leyhası çerçivesinde ”Desâte kvitnâ” cemaat teşkilâtı keçirdi. Regionlar arası körüşüvde Ukraina devlet migratsiya hızmetiniñ Odesa vilâyetindeki Baş idaresiniñ reisi Olena Pogrebnâk, Ukraina Yuqarı Şurası insan aqları boyunca Vekâletlisiniñ cenübiy vilâyetlerindeki temsilcisi Oleksandr Ostapenko, BMT Mahsus nezaret etici missiyasınıñ, BMT QİYKİ vekilleri, Mıkolayiv, Herson, Odesa, Kirovograd vilâyetlerindeki içtimaiy qoruv bölükleriniñ hadimleri ve vaqtınca işğal etilgen topraqlar ve devlet içinde köçken şahıslar meseleleri boyunca Ukraina Nazirliginiñ Herson vilâyetindeki bölüginiñ hadimleri de iştirak ettiler.
Tedbirniñ maqsadı – memleket içinde köçken şahıslarnıñ içtimaiy teminlev aqqına riayet etüvniñ menfiy ve müsbet misalleri boyunca tecribe ile paylaşuv, uquq qullanuv ameliyatını mükemmelleştirüv, uquqiy qaidelerni teñ olmağan allarda qullanuv, qanuniyetteki nuqsanlarnı ve eksikliklerni tüzetüv içün mütenasip vastalarnı araştıruv ve işlep çıqaruvdır. Bu cümleden, regionlar arası körüşüvniñ iştirakçileri memleket içinde köçken şahıslarnıñ gumanitar, içtimaiy, iqtisadiy ve saylav aqlarına riayet etüv, olarnı vaqtınca içtimaiy mesken ile teminlev kibi meselelerni muzakere ettiler.
Anatoliy Çehun öz çıqışında vaqtınca işğal etilgen Qırımdan köçken şahıslarnıñ aq-uquqlarını ve qanuniy menfaatlarını qorçalavı boyunca Ukraina Prezidentiniñ avalesi boyunca Temsilcilik işlep çıqarğan tekliflerni taqdim etti, memleket içinde köçken şahıslarnıñ aq-uquqlarına riayet etüv esnasında peyda olğan ve ameldeki qanuniyetke mütenasip deñişüvlerniñ kirsetilüvi, ya da müsbet neticelernen bitken mahkeme davaları vastasınen deral çezilüvni talap etken bir sıra meselelerge toplaşuvnda bulunğanlarnıñ diqqatlarını celp etti.
Vaqtınca işğal etilgen Qırım sakinlerini pensiyalar ile teminlev saasında problemalarnıñ mevcüt olğanını ve ameldeki qanuniyetke pensiyalarnı resmiyleştirüv ceryanında işğalci devletniñ pensiyalar ile teminlev organları ile nasıldır munasebetlerden azat etken deñişmelerni kirsetmege kerek olğanını qayd ettiler.
Uquq qullanuv ameliyatını mükemmelleştirüv, uquqiy qaidelerni teñ olmağan allarda qullanuv, qanuniyetteki nuqsanlarnı ve eksikliklerni tüzetüv boyunca panel munaqaşalarnıñ ve çeşit türlü uquq qullanuv ameliyatlarını muzakere etüvniñ neticesi olaraq, ameldeki qanuniyetke memleket içinde köçken şahıslarnıñ aq-uquqlarına ve serbestliklerine maniasız riayet etilmesi içün ameldeki qanuniyetke deñişmeler kirsetmek kerek olğanı aqqında qarar bir ağızdan qabul etildi.
Ukraina Prezidentiniñ Qırım MC Temsilciligi vaqtınca işğal etilgen topraqlardan köçken şahıslarnıñ aq-uquqlarını ve qanuniy menfaatlarını qorçalamaq maqsadınen qanuniyetke kirsetilecek deñişüvler boyunca teklifler üstünde çalışmağa devam etecektir.
