2018 senesi saban ayınıñ (mart) 20 künü Ukraina Prezidentiniñ Qırım MC Daimiy Temsilcisi Borıs Babin, onıñ Birinci muavini İzet Gdanov ve Temsilcilikteki hızmetlerniñ hadimleri Ukrainanıñ vaqtınca işğal etilgen Qırım topraqlarından mecburen köçip kelgen Ukraina vatandaşlarınıñ içtimaiy, medeniy, tasil ve mülkiyet aqlarına riayet etmek ve Temsilcilikniñ mütenasip haber-talil ve yönetici faaliyetini mükemmelleştirmek maqsadınen iş muşaveresini keçirdiler.
Keñeşte Dnipropetrovsk, Mıkolayıv, Odesa ve Herson vilâyeti devlet memuriyetlerindeki mütenasip bölükleriniñ ve idareleriniñ reberleri, Ukrainada (Herson) AHIT Mahsus nezaret taqımınıñ ve Ukrainada (Odessa) BMT İnsan aq-uquqları boyunca mahsus nezaret taqımınıñ vekilleri iştirak ettiler. Muşavere devamında Qırımdan Ukrainanıñ cenübiy regionlarına memleket içinde mecburen köçken şahıslarnıñ vaqtınca meskenniñ berilüvi, 2018 senesi kiriş kampaniyası çerçivesinde tasil hızmetlerine irişim, keyfiyetli tıbbiy yardımğa irişim, işke yerleşüvde yardım, içtimaiy hızmetlerni alğan şahıslarnı teşkerüv kibi eñ aktual meseleleri muzakere etildi.
Daimiy Temsilci işğal etilgen sözde ‘‘saylavlardan’’ soñ yarımadada cezalavlarnıñ quvetlenüvi sebebinden Qırımdan memleket içinde köçken şahıslarnıñ sayısı defalarca arta bilecegini tahmin etti. Onın içün, mesken meselelerini semereli şekilde çezmek maqsadınen işğal etilgen Qırım sakinleriniñ teşkerüv mehanizmniñ mükemmeleştirilüvi ve Devlet ve yerli bücetlerden maaliyeniñ ve halqara donorlardan tehnikiy yardımnıñ celp etilüvi boyunca işbirlik muzakere etildi.
Keñeş neticesi olaraq qırımlı abituriyentlerge aliy oquv yurtlarınıñ faalyeti aqqında malümat bermek, aliy oquv yurtlarınıñ mütenasip içtimaiy reklamasını azırlamaq, ‘‘Qırım-Ukraina’’ leyhası çerçivesinde 2018 senesi muvafaqiyetli kiriş kampaniyasını keçirmek içün faaliyetni planlaştırmaq qararlar qabul etildi. Memleket içinde mecburen köçken şahıslarğa keyfiyetli tıbbiy yardımınıñ berilüvi boyunca Odessa vilâyetiniñ muvafaqiyetli tecribesi, Odessa vilâyetinde işbu vatandaşlar içün içtimaiy mesken kompleksi qurucılığınıñ tezleştrilmesi, Dnipropetrovsk, Mıkolayıv ve Herson şeerlerinde tranzit şeerçikleriniñ ve kommunal yataqhaneleriniñ faaliyeti ile bağlı meseleler muzakere etildi.