Herson vilâyetini işğal etilgen Qırımdan ayırğan yolaqta Qırım Muhtar Cumhuriyeti politsiyası çalışmağa başlaycaq, onıñ faaliyeti Donetsk ve Lugansk vilâyetlerindeki politsiya tecribelerine esaslanacaq. Bunı dekabr 15 künü Mariupolge iş ziyareti devamında Milliy Politsiya yolbaşçısınıñ birinci muavini Vyaçeslav Abroskin bildirdi.

Ukraina Milliy Politsiya başlığınıñ avalesine binaen, Donetsk vilâyeti Baş politsiya idaresinde Donetsk vilâyeti, Qırım MC ve Aqyar boyunca Baş politsiya idareleriniñ yolbaşçıları ve Donetsk vilâyeti politsiyanıñ ihtisaslı IT-mutehassısları iştiragi ile keñeş olıp keçti.

İdare reisleri vaqtınca işğal etilgen topraqlarınıñ sıñırlarında yerleşken poliş idareleriniñ faaliyetleri saasında tecribelerinen paylaştılar. Bu cümleden, Donetsk vilâyeti politsiya hadimleri intellektual tehnologiyalar esasında çalışqan blokpost sistemasını taqdim ettiler. Bu sistema qısqa müddet içinde çoq sayıda vatandaş ve naqliyat vastalarını teşkermege imkân bere, teşkerüv ise bir qaç saniye devam ete.

Milliy Politsiya yolbaşçısınıñ birinci muavini Vyaçeslav Abroskin aytqanına köre, aynı vastalarnı vaqtınca işğal olunğan Qırımnıñ sıñırında da işletmege planlaştırıla.

”Biz terrorist ve Ukraina toprağına cinayet yapmaq içün kelgen başqa şahıslarnı belgilemege areket etmelimiz”, – dep qayd etti Vyaçeslav Abroskin. Havfsızlıq sistemasını vaqtınca işğal etilgen Qırımnıñ sıñırında çalıştırmaq maqsadınen iş gruppası meydanğa ketirildi.