5 октябрь 2016 сенеси Херсонда Къырым мухтар Джумхуриетиде Украина Президентининъ Даимий Векили Наталия Попович Херсон виляетинде Девлет миграцион хызмети идаресининъ башлыкъ муавини Дмитрий Ивановнен корюшти.

Корюшюв вакътында тарафлар «Украина гражданлыгъыны тасдикъ эткен, шахсиет я да махсус статусны исбатлагъан весикъалар боюнджа Авропа Бирлигинен Украина ичюн виза тертибининъ либерализациясынен багълы олгъан, базы Украина къануний актларына кирсетильген денъишмелер» къабул этильген Украина Къанунынен козь огюне алынгъан тешеббюслер акъкъында музакере эттилер.

Айрыджа, янъы шекильдеки электрон контактсыз ташыйыджылы Украина гражданлыкъ паспортынынъ кирсетилюв исляатнынъ невбеттеки къысымыны ерине кетирмеге имкян берген денъишмелерине дикъкъатны джельп эттилер. Энъ эвеля, вакътынджа ишгъаль этильген Къырым мухтар Джумхуриети ве Акъяр шеэри территорияларынынъ сакинлерине ID- варакъа ресмийлештирюв имкяниети акъкъында лаф юрсетильди.

Эм де, корюшюв кетишатында, тарафлар, вакътынджа ишгъаль этильген Къырым ярымадасында яшагъан я да Украинанынъ къыта тарафына кочькен Украина ватандашларны укъукъ ве азатлыкънен уйгъун шекильде теминлемесинде аль этюв ихтияджында олгъан айры миграция суаллери акъкъында музакере эттилер.