2018 senesi boş ay (noyabr) 26 künü Ukraina Prezidentiniñ Qırım MC Daimiy Temsilcisi Borıs Babin ve Temsilcilikteki halqara alâqalar hızmetiniñ baş mesleatçısı Valeriya Pahomova iş körüşüvi şekilinde Norvegiyanıñ Ukrainada Fevqulâde ve Vekâletli Elçisi Ule Terye Horpestad ile körüştiler.

Körüşüv esnasında Norvegiya vatandaşları tarafından vaqtınca işğal etilgen Qırımnı ziyaret etüv, Qırımnı işğal etmek ıntıluvını çetel devletlerge ve halqara teşkilâtlarğa qabul ettirmek maqsadınen işğalciler tarafından sözde ‘‘halq diplomatiyasını’’ taqlit etüv muzakere etildi.

Körüşüv esnasında vaqtınca işğal etilgen Qırımda Qızıl haç Halqara Komitetiniñ faaliyeti ve Şimaliy Qırımda yüz bergen ekologik facia muzakere etildi.

Borıs Babin Azaq-Qaradeñiz suvlarındaki Rusiyeniñ Ukrainağa qarşı tecavüziy areketleri ve halqara uquqnı qaba şekilde bozuvğa cevap olaraq Ukraina yapqan adımlar aqqında haber etti. Millliy sanktsiyalarnıñ semereligini arttırmağa, qabul etilgen sanktsion sıñırlavlarnı uyğunlaştırmağa ve işğalci devletke basqını arttırmağa kerek olğanını qayd etti.

Bundan da ğayrı, Daimiy Temsilci Herson vilâyetiniñ işğal etilgen Qırım civarındaki rayonlarda Memuriy hızmet merkezlerniñ teşkil etilüvi ve donatıluvı boyunca Temsilcilik yapqan adımlarnı, halqara tehnikiy yardımnı celp etmek kerekligini tarif etti.

Norvegiyanıñ Ukrainada Fevqulâde ve Vekâletli Elçisi Norvegiya Ukrainanıñ topraq bütünligine ve egemenligine qol tutqanını tekrarladı ve halqara uquqnı bozğan Rusiyeni takbih etti.