Apisten evel yaşayışı
İvan Yatskin 1978 senesi oktâbrniñ 22-nde Qırımnıñ Qurman rayonındaki Aybar (Voykove) köyünde doğdı. Apiske alınğanından evel İvan, Aqmescit şeerinde yaşay edi, anda o, tasil, medeniyet ve cemaat teşebbüslerine qoşula edi. Mında İvan cemaat yaşayışında iştirak ete edi, lektsiyalarğa qatnay, sanat tedbirlerini ve göñülli leyhalarını ziyaret ete edi, bu şekilde onıñ inançları ve cemaat faaliyeti şekillendi.
Yatskinniñ yaşayışında qorantasınıñ pek büyük emiyeti bar. Onıñ apayı qırımtatarıdır, bu da evde eki medeniy ananesini ve milliy kimliginiñ saqlanuv usullarını birleştirdi. Çiftniñ beş balası bar, dörtü babası tutulğanda daa 18 yaşına kirmegen edi. İvan apiske alınğanda, onıñ apayı beşinci balağa ağırayaqlı edi. Onıñ içün babalıq formallik degil de, er künlik qayğı, mesüliyetlik ve maneviy destek numunesi edi.
Uquq qorçalayıcılar ve advokatnıñ aytqanına köre, İvan apiske alınmazdan evel Ukrayina tarafını tuta edi.
Taqipler
2019 senesi oktâbrniñ 16-nda saat 6:00 rf fsb hadimleri Yatskinniñ evinde qanunsız tintüv keçirip, ukrayin vesiqalarını ve bilgisayarını tutıp aldılar. İvannıñ özüni tintüvden evel tutıp aldılar. Aynı şu künü Aqmescitteki işğalci “mahkeme” oña apiste tutuv şeklinde tedbir aldı.
İşğalci memuriyet, Yatskinni “devlet hainliginde” ve Ukrayina mudafaa quvetleri ile işbirlik yapmasında ve işğalci ordu aqqında malümat berüvinde qabaatladı. 2021 senesi mayısnıñ 21-nde Qırımnıñ sözde ”yuqarı mahkemesi” Yatskinni bir yıl azatlıqtan marum etüv ile 11 yılğa qadar sert rejimli koloniyada qalmasına üküm etti. “Mahkeme” qapalı rejimde keçti, mahkümniñ anası ve qorantasına mahkeme oturışuvına kirmege bermediler, advokatqa ise işğalciler oturışuvnıñ ketişatını tefsir etmege yasaq etti.
Apis müddeti
İvan apiske alınğan soñ Qırımdan moskovağa “lefortovo” sizosına etap etildi. Anda o, basqılarğa ve aşalavğa oğradı: onı -14°C derecede tek futbolka ve papuçta bir saatten ziyade tışta tutqanlar, qış urbası kiymesine izin bermegenler. Ruhiy basqı ve mahkemege qadar sağ qalmaycağı aqqında qorqutuvlarğa maruz qaldı. “Lefortovo”da olğanda sağlıq meseleleri peyda olmağa başladı: tiş, yürek ve ayaq ağrısı peyda oldı, amma kerekli tibbiy yardım kösterilmedi.
Üküm çıqarılğan soñ İvannı rf-niñ krasnodar bölgesine, soñra saratov vilâyetindeki koloniyağa alıp kettiler. Etap etüv vaqtında onıñ qorantasınen olğan bağı tolusınen yoq etildi: mektüpler kelmey edi, telefon körüşüvleri blok etile edi. Apis vagonlarındaki uzun yolculıqlar sağlıq vaziyetini fenalaştırdı ve bel ile ayaq ağrılarını arttırdı.
Ondan soñ Yatskinni, kemerovo vilâyetiniñ bilovo şeerindeki 44-ncı koloniyasına yollanıldı, anda o, 50 kün ceza izolâtorında tutuldı. Memuriyet oña muntazam sürette basqı yapa, onıñ ukrain vatandaşlığı olğanı içün çekiştire edi. Tutuluv şaraitleri pek yaramay edi: kameralar suvuq, aş qıtlığı, yibermelerni red etüv. İvannıñ sağlığı fenalaştı: ayaqlarında irinli yaralar, şiddetli tiş ağrısı, körme ve yürek meseleleri peyda oldı. Advokatlarnıñ ve aqrabalarınıñ tibbiy yardım kösterilmesi içün berilgen arizalar red etildi.
Apishanede bulunuv, fizikiy ve ruhiy dayanıqlığı içün bir sınav oldı. Lâkin, sert basqılarğa baqmadan, İvan Yatskin Ukrayinanı desteklemege devam ete, bu ise, onı daimiy şekilde repressiyalarğa oğramasına sebep ola.