Apisten evel yaşayışı
Ruslan Zeytullayev 1985 senesi iyünniñ 15-nde ailesi sürgün etilgen Özbekistannıñ Taşkent şeerinde dünyağa keldi. Doquz yaşında olğanda, qorantasınen Qırımğa qayttı ve Aqyar civarındaki Baydar qasabasına yerleşti. Ruslan mektepte yahşı oquy edi, oquv alâcısı edi, lâkin qorantasına yardım etmek içün çalışmağa mecbur olıp, 7-nci sınıftan soñ oquşını qaldırdı.
O, çeşit saalarda çalıştı: sofracı, aşçı, qurucı. Qıyın şaraitlerge baqmadan, Ruslan qırımtatar halqına ait olğan ruh küçüni ve degerliklerini saqlap qaldı.
2008 senesi o, Meryemnen evlendi.
У 2008 році він одружився з Мер’єм. Olarnıñ üç balası bar. Ruslan, cemaat yaşayışında faal olıp, çeşit teşebbüslerinde iştirak ete ve siyasiy mabüslerniñ qorantalarına qol tuta edi.
Taqip etilmesi
2015 senesi yanvarniñ 23-nde dört qırımtatarınıñ evlerine, hususan Zeytullayevlerniñ evlerine, rus FSB hadimleri sürip kirdi. O künü işğalciler qanunsız tintüvler keçirip, Nuri Primov, Ferat Sayfullayev, Rustem Vaitov ve Ruslan Zeytullayevni tutıp aldılar. Dörtüne qarşı sözde “Qırım musulmanları davası” uydurılğan dava çerçivesinde cinaiy iş açtı.
2016 senesi sentâbrniñ 7-nde rostov-na-donu mahkemesi Ruslan Zeytullayevni “terror teşkilâtınıñ faaliyetini teşkil etüv”, em de “evelden azırlanğan fitne boyunca teşkil etilgen gruppa tarafından akimiyetni zorbalıqnen zapt etüvge azırlanuvda” qabaatlap, 7 yıl apis cezasına mahküm etti, lâkin işğalci prokuraturası ükümnen razı olmayıp, işniñ ğayrıdan baqılmasını irdi.
Apishane
2017 senesi aprelniñ 26-nda aynı mahkeme Ruslannı qabaatlı tanıp, onı 12 yıl sert rejimli koloniyada qalmasına üküm çıqardı. 2017 senesi iyülniñ 27-nde rusiye yuqarı mahkemesi apis cezasını 15 yılğa qadar arttırdı.
Apis cezasından soñ Ruslannı, salavat şeerindeki 2-nci sert rejimli koloniyasına etap ettiler. 2024 senesi o, 40 kün ceza izolâtorında (ŞİZO) keçirdi, bundan soñ 31 martta umumiy lagerge qaytarıldı. Tutuluv şartları qattı olmağa devam ete, memuriyet tarafından daimiy sürette basqı yapıla.
Siyasiy taqiplerge cevap olaraq Ruslan bir qaç kere açlıq ilân etken edi. İlk sefer o, narazılığını 2017 senesi aprelniñ 4-nde rostov-na-donudaki mahkeme oturışuvında başlatqan edi. Bu narazılıq aktsiyası 22 kün devam etti, amma sağlıq vaziyeti fenalaşqanı içün toqtatıldı. 2017 senesi mayıs ayında o, qırımtatarlarnıñ taqip etilmesini toqtatmaq ve ukrain konsulınıñ kirsetilmesini talap etip, açlıqnı daa 10 künge devam ettirdi.
Ruslan Zeytullayev, “Qırım musulmanları davası” çerçivesinde taqip etilgen ilk qırımtatarlardan biri oldı. Onıñ davası, siyasiy taqip, insan aqları bozuluvı ve Qırımnıñ rusiye işğali şaraitinde qırımtatar cemaatına yapılğan sistematik basqınıñ parlaq nümünesidir.