Apisten evel yaşayışı

Emil Ziyadinov 1984 senesi iyünniñ 19-nda sürgünlik yerlerinde, Özbekistanda dünyağa keldi. 1993 senesi o, qorantasınen beraber tuvğan yarımadasına qaytıp keldi. Mektepte oqudı, soñra Tavrida milliy universitetine beden terbiyesi bölügine oqumağa kirdi ve 2006 senesi oquşını imtiyazlı diplomnen bitirdi.

2010 senesi evlendi, dört oğlu bar. 2017 senesi o, acılıqqa barıp keldi. Soñra elektrik zenaatını qazanıp, öz ihtisası boyunca çalıştı. Balalıqtan sportnen faal oğraşıp, yarışlarda iştirak etti ve çeşit mukâfatlar qazandı. Soñra ise, balalarğa idmanlıq yaotı ve olarnen öz tecribesinen paylaştı.

Emil Ziyadinov tutulmadan evel qırımtatar siyasiy mabüslerge ve olarnıñ qorantalarına qol tuta edi, mahkeme diñlevlerinde iştirak ete edi, apiste tutulğanlarğa yardım yetkize edi, tintüvler vaqtında vatandaşlarına qoltutmağa kele edi. 2018 senesi o, “Musulmanlar terroris degil” plakatınen bir özü piketke çıqtı.

Taqipler

2018 senesi narazılıqqa çıqqan soñ Emil tutıp alındı, başta memuriy protokol tizildi, soñra ise cörime belgilendi. Emil apiske atılıp, davanıñ materiallarını közden keçirgen soñ, qabaatlav bir adamnıñ – “Tatarov” lağaplı gizli şaatnıñ şaatlığına esaslanğanını öğrendi.

2020 senesi FSB hadimleri Emilni onıñ evinde tutıp aldılar. Onı, rusiyede terror teşkilâtı dep sayılğan “Hizb-ut-Tahrir” teşkilâtında iştirak etüvde qabaatladılar. 2022 senesi aprelniñ 19-nda işğalci “mahkeme” Emil Ziyadinovnı 17 yılğa mahküm etti. Onı “terror teşkilâtınıñ faaliyetini teşkil etüv” ve akimiyetni zornen elge almağa tırışuvda qabaatlı dep tanıdılar.

Apis müddeti

2022 senesiniñ soñunda Emilni rusiye federatsiyasınıñ lipetsk vilâyetine avuştırdılar. 2024 senesi sağlıq meseleleri aqqında belli oldı – Emil tiş tedaviylevine muhtac edi, amma oña vaqtında kerekli yardım kösterilmedi. O, baş ağrısından, qan basımı deñişkeninden de şikâyet ete edi.

Ondan soñ Emilni arhangelsk vilâyetindeki koloniyağa avuştırdılar – anda onı bir yıldan ziyade SİZO-da tuttılar. Bu müdette o, oña kelgen yiberüvler ve paralarnı almağa, evge telefon açmağa, qorantasınen körüşip olamay edi. Onıñ saqalını da, uzunlığı belgilengen qaidelerge uyğun olğanına baqmadan, zornen tıraş ete ediler. İntizamiy areketlerniñ esasları arasında, başqa şeylernen beraber, koloniyanıñ qaidelerine qarşı kelgen – gece namaz qıluv da bar edi. Belli bir vaqıttan soñra Emilni qattı tutuv şartları olğan bölükke avuştırdılar, bu ise onıñ sağlıq vaziyetini daa ziyade ağırlaştırdı.