Apisten evel yaşayışı

Kırılo Barannık 1998 senesi fevralniñ 8-nde doğdı ve apiske atılmadan evel pensioner anası ile beraber Aqmescitte yaşay edi.

Balalığından berli ayatı sportnen bağlı edi, Kırılo özüne sport yönelişini seçti. Onıñ israrlılığı ve işkirligi yahşı neticeler ketirdi, Barannık Ukrayina sport yönelişleri boyunca sport ustası unvanını qazandı. O, Qırım ve bütün Ukraiyna idmanlar cemiyetinde istidatlı ve kelecegi parlaq olğan sportçı olaraq belli edi.

Kırılo Ukrayinanı milliy ve halqara yarışlarda temsil ete edi. Hususan, 2014 senesi Makedoniyada gençler arasında Avropa çempionatında iştirak etti. Ukrayin bayrağı altında keçirilgen yarışlarda iştirak etkeni yüksek seviyede azırlığından ğayrı, öz memleketine olğan sadıqlığını da taqdim ete edi edi.

İşğal etilgen Qırımda ağır yaşayış şaraitlerine baqmadan, Kırılo Ukrayina tarafını tutqan vatanperver olıp qaldı. O, Ukrayinada doğğanını ve öskenini, ve bu kimlik onıñ içün ayatınıñ ayırılmaz bir parçası olğanını daima qayd ete edi.

Taqipler

2023 senesi mayısnıñ 30-nda Kırılo Barannıkni Aqmescitte FSB hadimleri qanunsız sürette tutıp aldı. Şaatlarnıñ aytqanına köre, onı Salğır özeniniñ yalısında tutıp, başına çuval kiysettiler ve sorğuğa alıp kettiler.

Başta onı 2023 senesi fevral ayında Bağçasaray rayonındaki Poştove (Bazarçıq) köyü civarındaki demiryolunda “diversiyağa” alâqası olğanında qabaatladılar. Vaqıt keçkeninen qabaatlavlar kenişletilmege ve quvetleştirilmege başladı, işke “devlet hainligi”, “terror teşkilâtınıñ faaliyetinde iştirak etüv, patlayıcı cihazlarnı qanunsız saqlav”, “patlayıcı maddelerniñ qaçaqçılığı”, “terakt azırlavı” ve “terrorizm areketini kerçekleştirüv” maddeleri qoşuldı.

Apis müddeti

Şimdiki vaqıtta Kırılo Barannık, rostov-na-donu mahkemesiniñ qararını beklep, Aqmescitniñ 2-nci SİZOsında tutula.

Kırılo Barannık tutılğan soñ, FSB hadimleri tarafından sert bir basqı altında qaldı. Onıñ bildirgenine köre, onı elektrik aqımı ile çekiştirdiler, qollarnen ve ayaqlarnen köteklegenler, suvda boğuvnı taqlit etkenler ve tuvğanlarına qarşı zorbalıqnen qorquzğanlar. Klemelerni el ve ayaq parmaqlarına, qulaq uclarına ve yanbaşlarına bağlağanlar, suvda boğuvnı taqlit etkenlerinde ise ellerini ve ayaqlarnı baylağanlar, betine ise qumaş qoyıp, üstüne suv tökkenler. Advokat, onıñ bedeninde bir çoq işkence izi qayd etti: yanıqlar, morluqlar, şişikler. Ukrayina insan aqları boyunca ombudsmenniñ bildirgenine köre, böyle zorbalıqtan soñ Kırılniñ böbrekleri ağırğan ve sağ qolunıñ hassaslığı qısmen ğayıp olğan.

Basqı ve zorbalıqqa baqmadan, Barannık qabaatını tanımağa red etti ve davanıñ diger mabüslerini tanımağanını bildirdi. Onıñ boysunmamazlığı, eñ ağır apis şaraitlerinde bile, dayanıqlılıq ve cesaretniñ parlaq bir isbatıdır.