Apisten evel yaşayışı

Dmıtro Ştıblikov 1970 senesi noyabrniñ 8-nde Zabaykalyede doğdı, amma balalıqtan berli Qırımda, Kezlev şeerinde yaşadı. Mektepten soñ Kıyiv yüksek umumarbiy komandanlıq oquv yurtunı bitirip, Ukraina Silâlı quvetlerinde hızmet etti. 2003 senesi ağır yaralanğanı içün sağlıq vaziyeti sebebinden ordudan çıqmağa mecbur oldı.

Ondan soñ, Qara deñiz regionınıñ telükesizligi ve geosiyaseti meseleleri boyunca “Nomos” merkezine işke kirdi. Arbiy ekspert olıp çalıştı, soñra halqara programmalarnıñ yolbaşçısı oldı ve “Qara deñiz telükesizligi” neşiriniñ baş muarrir muavini vazifesini aldı. Ukrayina ve halqara matbuat vastalarında yayınlandı, halqara uquq ve terrorizm ile küreş meselelerini tedqiq etti, zenaat konferentsiyalarında iştirak etti.

2014 senesi Qırımnıñ işğali başlağanından soñ yarımadada qaldı.

Taqip etilüv

2016 senesi noyabrniñ 9-nda Aqyarda fsb hadimleri Dmıtro Ştıblikovnı tutıp aldılar. Onen beraber apayı da tutılğan ve sorğuğa çekilgen edi. Ştıblikovnıñ bulunğan yeri ise bir qaç kün devamında belli degil edi.

Rusiye mahsus hızmetleriniñ iddalarına köre, o, astyapı obyektlerine ücüm etmege planlaştırğan “diversiya-terroristik gruppasınıñ” iştirakçisi ola. 2017 senesi, basqı ve qorquzuvlar altında, tahqiqat ile mahkemeden evel añlaşmağa ve qabaatını tanımağa mecbur oldı. Davanı delillerge baqmadan alıp barğanlar.

2017 senesi noyabr ayında Aqyarda işğal mahkemesi onı 5 yılğa qadar sert rejimli koloniyada qalmasına üküm etti.

2021 senesinde bu müddet bitken soñ, Ştıblikovnı apisten çıqarmadılar. Aynı şu künü oña qarşı “devlet hainligi” maddesine istinaden yañı dava açıldı. Neticede oña daa 14 yıl ve 6 ay apis cezası berildi.

Apiste

Ekinci ükümden soñ Dmıtro Ştıblikovnı Omsk şeerindeki sert rejimli koloniyağa etap ettiler. Apishanedeki şaraitler sağlığına tesir etti: gipertonik hastalığı inkişaf etti, közleri fenalaştı, tiş ağrıları peyda oldı. Koloniyada pek qıt yemek berile, bu da fizikiy alına tesir ete.

Ştıblikov, telefon bağı ve qorantası ile alâqa imkânı olmadan, aman-aman bütünley izolâtsiyada buluna. O, yalıñız tutula, kitaplarğa irişimi sıñırlı, yürüş ise künde tek bir saat berile.

Onıñ davası rusiye vaqtınca işğal etilgen topraqlarda Ukrayina vatandaşlarını taqip etmek içün uydurılğan qabaatlavlarnı nasıl qullanğanınıñ daa bir örnegidir.