2018 senesi ilk qış (dekabr) ayı 8 künü Kıyiv şeerindeki ”Dovjenko-merkezi”nde ”Esirlikteki icat. Şaatlarnıñ delilleri” mevzusında munaqaşa keçirildi ve ingliz tilinde neşir etilgen ”Oleg Sentsov” serlevalı kitap taqdim etildi.
Tedbirde Qırımtatar Milliy Meclisiniñ reisi Refat Çubarov, onıñ muavini İlmi Umerov, Gayana Yüksel, Temsilcilikteki halqara alâqalar hızmetiniñ reisi Yevgen Samuha ve başqa musafirler iştirak etti.
Oleg Sentsovnıñ esirlik şaraitlerindeki icadiy ve aqliy qabiliyetlerinen bir sırada onıñ cesür vatanperver mevamına ve azatlıq içün küreş tecribesine yüksek qıymet kesildi. Tedbir iştirakçileri rusiye esirliginde bulunğan ukrain vatanperverniñ areket tarzı aqıl vastasınen qarşılıq kösterüvniñ misali, Qırım ile Ukraina arasında medeniy bağ olğanını qayd ettiler.
Oleksandr Krasovitskiy neşir etken ”Oleg Sentsov” kitabınıñ bir qısımı ukrain kitaphanelerine, devlet müessiselerine ve çetel diplomatik teşkilâtlarına bedava taqdim etilecektir.
