2018 senesi boş ay (noyabr) 1 künü Temsilcilikteki halqara alâqalar hızmetiniñ reisi Yevgen Samuha ve hızmetniñ baş mesleatçısı Valeriya Pahomova keçici devirde adaletni temin etüv ile bağlı qanun yaratıcılıq teklifleriniñ azurlanuvı boyunca Koordinatsion şurasınıñ, Ukraina Yuqarı Şurasınıñ insan aqları boyunca Vekâletlisiniñ Ofisinde keçirilgen nevbetteki oturışında iştirak ettiler.

Oturuş esnasında taraflar ‘‘Silâlı davanıñ neticelerini yoq etüv şaraitlerinde insan aq-uquqlarını qorçalav boyunca devlet siyaseti’’ qanun leyhasında tasvir etilgen keçici devirde adalet konseptsiyasını ve onıñ 1-nci bölügine Koordinatsion şurasınıñ azaları ve ekspertleri tarafından teklif etilgen deñişmelerni ve qoşmalarnı muzakere ettiler.

Temsilcilikniñ hadimleri toplaşuvda qanun leyhası boyunca evelki toplaşuvlar temelinde işlenilgen esas teñkiqiy fikirlerini, bu cümleden, dava soñrası devirde cemaat teşkilâtlarınıñ vekâletleri boyunca fikirlerini beyan ettiler, teñkiq toplaşuv iştirakçileri tarafından muzakere ve qabul etildi.

Bundan da ğayrı, Koordinatsion Şurasınıñ azaları qırımtatar halqınıñ ve  rusiye istilâsından azap çekken başqa Ukraina cemiyetleriniñ siyasiy ve medeniy aqlarını qanun leyhasınıñ maddelerinde ayrıca pekitmek qararını qabul ettiler. Qanun leyhası üstünde çalışuv al-azırda devam etmekte.