Afta içinde olıp keçken esas vaqialar
▶ Ukrayina Silâlı Quvetleriniñ Baş Ştabı fevralniñ 23-nde Qırımda rusiye Qara deñiz flotunıñ 15-nci ayrı raketa brigadasınıñ raketa diviziyası yerleşken yerge ücüm etilgenini bildirdi. Bundan da ğayrı, fevralniñ 25-nde askerler Sofiyevka qasabası yanında S-400 Triumf zenit raketa sistemasını, em de “Pantsir S-1” zenit raketalar ve top sistemasınıñ cenk maşinası urdılar.
▶ Fevralniñ 24-nde Ukrayina Silâlı Quvetleriniñ pilotsız sistemalar quvetleri Qırımda “Pantsir S-1” zenit raketa ve top kompleksini ve R-18 radar stantsiyasını yoq ettiler. Aynı şu künü “Ptahi Madyara” brigadası Novofedorivka qasabası yanındaki “Malahit” radar stantsiyasına da ücüm etti.
İşğal cinayetleri
▶ Fevralniñ ayına qadar işğal etilgen Qırım topraqlarında 284 insan qanunsız şekilde taqiplerge oğratıla, olardan 159 kişi – qırımtatarı.
▶ 2026 senesi fevralniñ 11-ne qadar vaqtınca işğal etilgen Qırımda “rusiye federatsiyasınıñ silâlı quvetlerini itibardan tüşürüv” aqqında rf memuriy cinayetler kodeksiniñ 20.3.3 maddesine köre açılğan 1684 dava qayd etildi. 1547 davada para cezalarınıñ berilmesi ya da davalarnıñ birleştirilmesi aqqında qarar alındı. 24 davanıñ baqılması daa devam ete. Qararlarnıñ 819 (53%) qadınlarğa qarşı ve 726 (47%) erkeklerge qarşı çıqarıldı.
▶ Qırımtatar siyasiy mabüs Amet Suleymanovnıñ sağlığı fenalaştı. Qırımnıñ işğali başlanğan soñ, Amet rus işğalcileriniñ qanunsız areketlerini, şu cümleden tintüvlerni ve tutuluvlarnı aydınlattı. 2020 senesi rusiyeniñ havfsızlıq küçleri onı tutıp aldılar. Soñra onı ev nezareti altına yolladılar, çünki o, sağlıq vaziyeti sebebinden mahkeme evelsi SİZO-da bulunıp olamay edi. 2023 senesi Amet Suleymanov, kene de tutulıp aldı, bir vaqıttan soñ rusiye federatsiyasındaki apishanege yollanıldı, şimdi de o, anda tutulmaqta. Al-azırda ise, ciddiy yürek hastalığı ve gipertoniya inqirazından ğayrı, oña çilter zarı angiopatiyası diagnozı qoyuldı, eger mabüs tedaviylev körmese, tamamınen soqıp qala bile.
▶ Aqyar şeeriniñ Gagarin rayon mahkemesi Sergiy Grişçenkovnıñ doğmuşları tarafından berilgen arizanı red etti. 2025 senesi mayıs ayında o, fsb hadimleri tarafından qaçırılğan edi ve “devlet hainliginde” qabaatlanğan edi. Qorantası serbestlikniñ qanunsız marum etilmesi ve “prokuratura”nıñ areketsizligi aqqında apellâtsiya berdi, amma işğalci “mahkeme” bütün talaplarnı qandırmaqtan red etti ve işni qapattı, arizacılarğa temyiz bermege de ruhset bermedi.
▶ 2022 senesi maksimal havfsızlıq apishanesinde 13 yılğa mahküm etilgen Yaşar Muyedinov rusiyeniñ omsk şeerindeki 9-ncı sanlı ceza koloniyasına avuştırıldı. Köçürilmeniñ sebepleri añlatılmay. Ruslar oña fizikiy ve psihologik basqı yapqanlar. Umumen, onıñ sağlıq vaziyeti, hususan, kerekli tibbiy yardımnıñ olmaması sebebinden bozuldı. Siyasiy mabüs tiş ağrısına, ayaq şişkinligine şikayet ete.
Zorlavnen seferberlik
▶ Rusiye ordusınıñ Qırımda bulunğan bölüklerinden eñ az 2777 asker öldi. Olar arasında 1478 kişiniñ Ukrayina vatandaşı olğanı tahmin etile.
▶ İşğal etilgen Qırımdan eñ az 125 rf arbiy hadiminiñ esirge alınğanı tasdıqlandı, olarnıñ çoqusı ihtimal Ukrayina vatandaşı.
Qırım yarımadasınıñ askeriyleştirüvi
▶ Ruslar Qırımda yaşlarnı askerleştirmege devam eteler. Meselâ, fevral ayında “Qırım pilotsız tehnologiyalar ilmiy-tedqiqat institutı müdiriniñ mesleatçısı” İgor Boyko 47 studentniñ oquvnı bitirgenini ve insansız ava vastalarınıñ operatorları olaraq tasil alğanı aqqında haber etti. Sözde “mesleatçınıñ” aytqanına köre, talebeler başta onlayn şekilde tasil aqlğanlar, soñra ise öz ustalıqlarını “amelde” deñegenler.
▶ Fevralnıñ 24-nde Aqyarda yaşlarnı rusiye silâlı quvetleri saflarına qoşulmağa isteklendirmege” maqsat tutqan tedbir ötkerildi. Biñge yaqın talebe iştirak etti. Tedbirde birinci yardım kösterüv, lazer silânen atışlar, “Kalaşnikov” avtomatını parçalarğa ayıruv ve cıyuv öğretildi.
▶ “Krımskiy veter” monitoring gruppası Aqyar körfeziniñ suvlarında rusiyeniñ Qara deñiz flotu gemilerni qapatmaq içün raketalar içün sahte maqsatlar taqlidi içün qullanılğan pasiv radio elektron cenk donatmalarını qullanğanını qayd etti. Lâkin böyle donatmalar eñ soñki raketalar sistemalarına qarşı effektiv degil.
İşğalci memuriyetleriniñ propagandası ve duşmanlıqnı qızıştırması
▶ Aqmescit tehnikumında sözde “svo” iştirakçileri içün “şan-şüret alleyası” açıldı. Müessisede 19 yaşından 21 yaşınace olğan dört asker aqqında hatıra levhaları qoyuldı.
▶ Aqyarda rus işğalcileri “Balalıqnıñ navigatorları: birlikte quvet” adlı strategik sessiyasını keçirdiler, onıñ çerçivesinde rusiyede ilân etilgen “rusiye halqlarınıñ birlik yılı” çerçivesinde mektep talebelerini terbiyelev, hususan da rus tilini polularlaştıruv usulları belgilendi.
📌Temsilciligimizge, işğalge ve total propagandağa dayanalmayıp Qırımdan ketmege istegen Ukraina vatandaşlarından mektüpler kelmege devam etmekte. İşğal etilgen Qırımdan çıqış hususında talimatnamemiz aqqında hatırlatamız: https://cutt.ly/FwtiajlS
İşğal etilgen Qırımda yaşağan ve yarımadadaki vaziyet, içtimaiy-iqtisadiy vaqialar, rus ordusınıñ yerini deñiştirüvi, qarşılıq areketleri ve başqa adiseler aqqında haber etken añlayışlı Ukrayina vatandaşlarına teşekkürlerimizni bildiremiz. Tafsilâtlı malümatnı Temsilcilikniñ matbuat hızmetiniñ e-mail adresine yollañız: [email protected].
Ukrayinağa şan-şerefler olsun!