2018 senesi boş ay (noyabr) 21 künü Ukraina Prezidentiniñ Qırım MC Daimiy Temsilcisi Borıs Babin Ukraina Yuqarı Şurası medeniyet ve ruhiyat boyunca Komitetiniñ oturışında vaqtınca işğal etilgen Qırımda medeniy ve atiqiy mirasnı qorçalav boyunca maruza ile çıqışta bulundı.
Borıs Babin öz çıqışında Qırımda temel halqlar ve diniy cemiyetler aqlarınıñ qorçalavını quvetleştirmege kerek olğanını qayd etti, vaqtınca işğal etilgen yarımadada tarihiy ve medeniy yadıkârlarnıñ bozulmasına ve yoq etilüvine, qanunsız atiqiy qazmalarğa ve Qırımdan RF-na medeniy qıymetlerniñ çıqarıluvına misaller ketirdi.
Komitet izaatlarğa ve Ukrainanıñ vaqtınca işğal etilgen Qırım toprağından istilânıñ devam etmesine qarşılıq kösterüv, Qırımda Ukraina devletiniñ, uquqiy şahıslarınıñ ve vatandaşlarınıñ aq-uquqlarını qorçalav boyunca 2018-2019 seneleri içün acele tedbirler Planınıñ ruhiyat ve medeniyet boyunca maddelerini yerine ketirüvge dair areketlerge, Qırımdaki ukrain medeniy asabalığını çaypalağan ve yarımadadan alıp ketken teşkilâtlarnı sanktsion cedvellerine kirsetmek teklifine qol tuttı.
Aynı şu künü Daimiy Temsilci Ukraina Yuqarı Şurası insan aqları, milliy azınlaqlar ve halqara munasebetler meseleleri boyunca Komitetiniñ ‘‘Vaqtınca işğal etilgen topraqlarda ve RF-nda Ukraina vatandaşlarını siyasiy sebepten ve qanunsız şekilde taqip etüvge alâqası olğan şahıslarğa qarşı sanktsıyalarnı qullanuv boyunca devlet siyasetini mükemmelleştirüv’’ mevzusında komitet diñlevlerinde iştirak etti.
Diñlevlerde mütenasip şahıslarğa qarşı sanktsıyalarnı qullanuv boyunca devlet siyasetini ve milliy sanktsiyalarnı mükemmelleştirüv, Ukraina vatandaşlarını siyasiy sebepten ve qanunsız şekilde taqip etüvge alâqası olğan şahıslarğa qarşı sanktsiyalarnı kirsetüvge ğarbiy memleketlerni de celp etüv, Ukraina sanktsion siyasetini ‘‘Magnitskiy aktı’’ maddelerinen uyğulav muzakere etildi.
Daimiy Temsilci öz çıqışında sanktsiyalarnıñ qullanuvına ameliy misaller ketirdi, Ukrainada istilâcı devletni temsil etken şahıslar taraftan açılıp, Temsilcilikniñ faaliyeti ile bağlı olğan mütenasip mahkeme davalarnıñ ketişatını talil etti. Borıs Babin sanktsiyalarnı Milliy bank, Ukraina havfsızlıq Hızmeti ve Ukraina Nazirler Şurası vekâletleri çerçivesinde mütenasip qanunlar esasında qullanmağa kerek olğanını qayd etti, al-azırda imkânları pek sıñırlı olğan icra akimiyetiniñ ayrı merkeziy organına bütün devlet organlarnıñ sanktsiyalar meselesi boyunca areketlerini idare ettirmek israrlı amma fadasız ıntıluvlarnı qattı teñqitke oğrattı.
Borıs Babin sanktsiyalarnı qullanğanda yalıñız insan aqlarını qorçalav çerçivesinen sıñırlanmamağa çağırdı, istilâcı devletke ve onıñ vekillerine boysunğan büyük iqtisadiy strukturalarğa qarşı qullanğan sanktsiyalar daa tesirli olğanını qayd etti. Sanktsiyalardan qaçmaq maqsadınen mülkniñ saibini deñiştirmek ıntıluvlarğa qarşı kösterüv olaraq, sanktsiyalarnı em mülküniñ özüne, em de sanktsiya altında bulunğan şirketlerniñ ukrain ortaqlarına da keñişletmege kerek olğanını qayd etti.
Bundan da ğayrı Daimiy Temsilci Ukraina Yuqarı Şurasınıñ devlet hızmeti ve öz-özüni idare etüv organlarında hızmet boyunca alt komitetinıñ devlet qurucılığı, regional siyaset ve yerli öz-özüni idare etüv meseleleri boyunca oturışında iştirak etti. Komitetler ile işbirlik al-azırda devam etmekte.
