2018 senesi (fevral) kiçik aynıñ 27 künü Ukraina Prezidentiniñ Qırım MC-deki Temsilciligi Ukraina Yuqarı Şurasınıñ Qanuncılıq institutı ile beraberlikte ‘‘Qırım işğaliniñ dörtünci yıllığı: aqibeti ve istiqbali’’ mevzusında tögerek masa keçirdi. Tögerek masada Ukraina Prezidentiniñ Qırım MC-de Daimiy Temsilcisi professor Borıs Babin, Qanuncılıq intsitutınıñ reberiyeti ve alimleri, V.İ. Vernadskiy adına Tavriya Milliy Universitetiniñ rektorı Volodımır Kazarin,bir sıra oquv ve tedqiqat muessiselerni alimler olaraq temsil etken Ukraina halq deputatları, bu cümleden, Temsilcilikniñ terkibinde çalışqan Ekspert Şurasınıñ azaları, diger halq deputları, cemaat ve uquqqorçalayıcı teşkilâtlarınıñ vekilleri ve matbuat vastaları faal iştirak etti.

İnstitut müdüriniñ muavini professor Yevgen Berşeda ve Daimiy Temsilci Borıs Babin mecliste bulunğanlarnı hayırlap, tögerek masanıñ maqsadını ilân ettiler.

Borıs Babin öz çıqışında Temsilcilikniñ faaliyetinde anayasal ve qanun çıqarıcı esasları aqqında ikâye etti, Qırımnıñ vaqtınca işğali şaraitlerinde Ukraina Prezidentiniñ emirleri ile belgilengen Temsilcilikniñ vazifelerinen tanıştırdı. Daimiy Temsilci Qırımnıñ işğalden azat etilüvi ve ğayrıdan integratsiyası boyunca areket planlarını ve strategik vesiqalarnı ilmiy ve ekspert temellerine esaslanıp azırlamağa kerek olğanını qayd etti.

Professor Volodımır Kazarin vaqtınca işğal etilgen Qırımda yaşağan Ukraina vatandaşlarınıñ tasil aqlarına riayet etüv, vaqtınca işğal etilgen yarımadada olarnıñ aq-uquqlarını ve serbestliklerini qorçalavı meselesini köterdi, Qırımdaki oquv yurtları litsenziyalarını ğayıp etkenlerini bildirdi.

Tedbir çerçivesinde Qırımnıñ vaqtınca işğali şaraitlerinde insan aq-uquqlarına riyaet etüvniñ vaziyeti; vaqtınca işğalniñ halqara-uquqiy ölçevleri; Qırımnıñ vaqtınca işğali şaraitlerinde milliy qanuniyetniñ, uquqiy ameliyatnıñ ve idare mehanizmlerniñ inkişafı; rusiye istilâsınıñ bir qısımı olğan işğalge program vesiqalar ve mehanizmler vastasınen qarşılıq kösterüv kibi aktual meseleler muzakere etildi.

Tögerek masanıñ iştirakçileri Qırımnı ilhaq etüv teşebbüsine uquqiy ceetten qıymet kestiler, işğalci akimiyet Qırımda insan aq-uquqlarını bozğanını, halqara cinayetlerni yapqanını muzakere ettiler. ‘‘Ukrainanıñ vaqtınca işğal etilgen Donetsk ve Lugansk vilâyetlerindeki topraqlarında devlet egemenligini temin etüv boyunca milliy siyasetiniñ hususiyetleri aqqında’’ Ukraina qanunı qabul etilmesiniñ neticesi olaraq, ameldeki ukrain qanuniyetni mükemmelleştirüv meselesi köterildi.

Tögerek masanıñ yeküni olaraq Ukraina Prezidentiniñ Qırım MC-de Temsilciliginiñ terkibinde çalışqan Ekspert şurasınıñ oturışı keçirilip, kelecekte faaliyet, Qırım meselesi boyunca ilmiy ve tedqiqiy işlerniñ mevzuatı, Ukrainanıñ vaqtınca işğal etilgen Qırım toprağından istilânıñ devam etmesine qarşılıq kösterüv olaraq acele areket Planınıñ mundericesi ve metodologiyası, Qırımda Ukraina devletiniñ, uquqiy şahıslarınıñ ve vatandaşlarınıñ aq-uquqlarınıñ qorçalavı kibi meseleler muzakere etildi.