Temsilcilikniñ kognitiv deokupatsiya ve yaşlar yönelişiniñ inkişafı boyunca Şuranıñ faaliyeti çerçivesinde, Temsilcilik taqımı Odesağa ziyaretten soñ Dniproğa yol aldı.

Ziyaret çerçivesinde, Daimiy Temsilci adından regionda Qırım yarımadası mevzusınıñ inkişafı boyunca yerli idare organları, aliy oquv yurtları, cemaat teşkilâtları vekillerinen bir sıra iş körüşüvleri keçirildi. Hususan, Dnipro şeerinde Qırım mevzusına bağışlanğan yañı tedbirler, şu cümleden medeniy-bediiy sergiler, muzakere meydançıqları, yaşlar içün tasil teşebbüsleri keçirilmesi planları muzakere etildi.

Bundan da ğayrı, hususan, aprelniñ 25-nde Dnipro şeerinde “Qırım ve yaşlar: turğunlıq körüvi, birlik degerlikleri” adlı muzakereler seriyasından daa bir yaşlar seminarı keçirildi, tedbirde orta mektep talebeleri, studentler, cemaat birleşmeleriniñ faalleri ve yaşlar teşebbüsleriniñ iştirakçileri bir arağa keldi. Tedbirde 35-ten ziyade yaş iştirak etti.

Tedbirniñ açılışında Temsilcilikniñ informatsion teminlev bölüginiñ müdiri Yevğen Bondarenko, yerli akimiyet organlarınıñ vekilleri, hususan, Dnipro şeer başınıñ muavini Andriy Denısenko iştirak ettiler. Açılış qısımında Qırım mevzusınıñ bütün Ukraina içün emiyeti, yarımadanıñ reintegratsiya ve restavratsiya ceryanlarında yaşlarnıñ rolü qayd etildi.

Yevgen Bondarenko öz çıqışında Ukrainanıñ tamır halqları olğan qırımtatarlar, qaraimler, qırımçaqlarnı temsil etken yaşlarğa yardım etüvge baqtırılğan Temsilcilikniñ teşebbüsleri aqqında aytıp berdi, ayrıca o, sistemalı insan aqları bozuluvlarınen bağlı çağıruvlarğa, ruslaştıruv siyasetine, Qırım yarımadasınıñ askeriyleştirüvine diqqat ayırdı.

“Biz Qırımnı hatırlağan ve onıñ inkişafı ğayesinen yaşağan nesilni şekillendirmek kerekmiz. Yaşlar adalet ve işğal altında qalğan insanlarnıñ aqları içün küreşte faal olmaq kerek”, — Yevhen Bondarenko.

Lektsiya qısımında turğunlıq, havfsızlıq ve strategik kommunikatsiyalar boyunca halqara ekspert Dmıtro Teperik ve Ukraina mustaqil siyasiy araştırmalar merkeziniñ idare reisi, Turğunlıq ve birlik milliy platformasınıñ tesisçisi Yuliya Tışçenko iştirak ettiler.

Tedbir devamında Dmıtro Teperik yaşlarnı Qırımnıñ kelecek imicini şekillendirüvde faal iştirak etmege çağırdı, yarımadada serbest ve adaletli cemiyet qurmaq içün nasıl deñişmeler kerekligini endiden añlamaq müim olğanını qayd etti.

Yuliya Tışçenko işğal etilgen topraqlarnıñ sakinlerinen bağnı saqlap qalmaqnıñ müimligini qayd etip, yarımada azat etilgen soñ olarnıñ işançını saqlav esas vazifelerden biri olacağını ifade etti.

Tedbir devamında iştirakçiler gruppalarda çalışıp, qırımtatarlarnıñ tilini ve medeniy mirasını saqlap qaluv, Ukraina ve Qırım arasındaki informatsion boşluqnı aşuv, tamır halqlarğa yardım etüv yolları, Qırımnı milliy saağa qaytaruv strategiyalarını muzakere ettiler. Yaşlar yarımadanıñ işğalden qurtarılmasından soñ çağıruvlar ve imkânlar aqqında fikir yürsetip, Qırımnıñ adaletli, demokratik ve inklüziv kelecegi aqqında ğayeni şekillendirmekniñ müimligini qayd ettiler.

Tedbir Temsilcilik ile Büyük Britaniya, Estoniya, Kanada, Felemenk, Norvegiya, Amerika Qoşma Ştatları, Finlândiya, İsviçre ve İsveçiya ükümetleri tarafından desteklengen “Kuçlü Ukraina içün ortaqlıq” fondunıñ yardımınen teşkil etti.

Aynı vaqıtta tedbirge Ukraina gençler ve sport nazirligi, Bütünukrain gençler merkezi, Dnipro şeer şurası ve Dnipro vilâyetiniñ arbiy idaresi, Dnipro gençler merkezi, Crimea Daily ve “Cemaat” media teşebbüsleri, “Skola MediaPatriotiv” ve “Metanetli Ukraina” cemaat teşkilâtları qol tuttı.