2018 senesi ilk yaz ayı (iyün) 25 künü Ukraina Prezidentiniñ Qırım MC Daimiy Temsilcisiniñ Birinci muavini İzet Gdanov Poloniya Cumhuriyetiniñ Varşava şeerinden kelgen eyet – Halqara alâqalar institutınıñ talilcisi Konrad Zaştof ve Arbiy sanat akademiyasınıñ hadimi Nataiya Orlovska ile körüşti.

Körüşüv esnasında Ukrainanıñ Qırım toprağınıñ vaqtınca işğali sebebinden peyda olğan geopolitik meseleler çerçivesinde Qırım meselesi muzakere etildi.

İzet Gdanov ilk nevbette musafirlege işğal etilgen yarımadada kütleviy şekilde insan aqları bozulğanı, temel qırımtatar halqınıñ vekilleri represiyalarğa oğratılğanı, Ukrainanıñ vaqtınca işğal etilgen Qırım toprağında yaşağan Ukraina vatandaşlarnıñ tasil, söz, fikirlerni beyan etüv serbestlikleri sıñırlanğanı, mesken, topraq, mülkiyet, saylav aqları bozulğanı, telekommunikatsion ve haber menbalarğa irişim sıñırlanğanı, olar zorbalıqnen köçürüv ve gibrid sürgünlikke oğratılğanı aqqında haber etti. Böyleliknen, işğalcilerniñ maqsadı Qırım sakinleri içün içtimaiy-medeniy muitniñ yaratıluvı degil de, yarımadanıñ arbiyleştirilüvi olğanı açıq-aydındır.

Izet Gdanov Qırımdan memleket içinde köçken şahıslarnıñ miqdarını bildirdi, olarnıñ aqlarını qıta Ukrainada yerine ketirüv ve ‘‘Qırım-Ukraina’’ leyhası çerçivesinde qırımlılarnıñ tasil aqlarına riayet etüvde, işğal etilgen topraqlarnıñ sakinleri içün Memuriy hızmet merkezleriniñ teşkil etüvde, bu cümleden ‘‘Dokument’’ Devlet Müessiseseniñ keñişletüvde Temsilcilikniñ rölüni tarif etti. Bundan da ğayrı, memleket içinde Qırımdan köçken qırımtatarlarnıñ Ukraina vilâyetlerinde yerleşüvge, Qırımtatar Milliy Meclisiniñ faaliyetine ve Ukraina topraqlarında onıñ territorial bölükleriniñ rölüne de diqqat etildi.

Birinci muavin Temsilcilikniñ statusı, vekâleti, Qırımnıñ vaqtınca işğali neticesinde peyda olğan meselelerni çezüvde uquq qorçalav ve icra akimiyet organları, cemaat ve halqara teşkilâtlar ile işbirligi aqqında haber etti.

Körüşüvniñ soñunda İzet Gdanov halqara cemiyetniñ iqtisadiy basqı oğrunda birleşüvi ve sanktsiyalarnıñ quvetlendirüvi Qırımnı işğalden azat etmege ve bütün memleketniñ territorial bütünligini ğayrıdan tiklemege yardım etecegini qayd etti.