Martnıñ 6-nda Daimiy Temsilci Olga Kurışko Ukrayina Tış işler nazirligi ve Milliy Meclis tarafından teşkil etilgen iftarda iştirak etti.

2023 senesi Tış işler nazirligi tarafından başlatılğan iftar endi bir anane oldı. Er yıl tedbirge devlet organlarınıñ, diplomatik korpusnıñ vekilleri, halq deputatları, medeniyet ve cemaat erbapları qoşulalar.

Bu sene tedbirge Tış işleri Naziri Andrey Sıbiga ve onıñ muavini Maryana Betsa, ukrayin askerleri, Milliy Meclisiniñ reisi Refat Çubarov, qırımtatar halqınıñ lideri Mustafa Cemilev ”UMMA” Ukrayina musulmanları diniy idaresiniñ müftisi Murat Süleymanov, Qırım MC musulmanları diniy idaresiniñ müftisi Ayder Rustemov ve digerleri qoşuldılar.

Andrey Sıbiga öz çıqışında Ukrayinanı qorçalağan askerlerge teşekkür bildirip, rusiyeniñ cenki Qırımdan başlanğanını ve onıñ azat etilmesinen bitirilmesi kerekligini qayd etti.

“Biz vaqtınca işğal etilgen topraqlarda qalğanlarnı ve qarşılıq köstermege devam etkenlerni hatırlaymız. Biz er kün Rusiye tarafından qanunsız tutulğan bütün vatandaşlarımız azat etilmesi ve öz evlerine, qorantalarına qaytması içün çalışamız.”