İyünniñ 5-nde Ukraina Prezidentiniñ Qırım Muhtar Cumhuriyetindeki Temsilciligine Türkiye Cumhuriyetiniñ Ukrainadaki Fevqulâde ve Salâhiyetli Elçisi Mustafa Levent Bilgen ziyaret ile keldi.

Daimiy Temsilci Olga Kurışko Türkiyege Ukrainanı desteklegeni ve devletimizniñ topraq bütünligine nisbeten deñişmegen mevamı içün teşekkür bildirdi. Körüşüvge Daimiy Temsilciliginiñ muavini Denis Çistikov ve Qırım platformasınıñ faaliyetini temin etüv hızmetiniñ hadimleri qoşuldı.

Türkiye elçisi Mustafa Bilgen devleti Ukrainanıñ suverenitetini ve topraq bütünliginiñ desteklenüvi boyunca mevamını deñiştirmeycegini qayd etti. Onıñ qayd etkenine köre, Türkiye 2014 senesi de Qırım yarımadasınıñ rusiye tarafından işğal etilmesini takbih etken edi. Elçi şunı da qayd etti ki, Türkiye Ukrainağa çeşit formatlarda qol tutmağa azır ve Halqara Qırım platformasınıñ faal iştirakçisi olmağa devam ete.

Olga Kurışko Temsilcilikniñ şimdiki faaliyeti aqqında aytıp berdi. Bundan da ğayrı, o, keçici adalet, rusiyeniñ işğal etilgen Qırımda yapqan cinayetleri, hususan medeniy mirasnıñ yoq etilmesi, Ukraina tamır halqlarınıñ temsilcilerine yapılğan basqı mevzularına diqqat celp etti. Körüşüv vaqtında Qara deñiz regionında ekologik telükesizlik meselesine, hususan, 2024 senesi dekabr ayında Keriç keçitinde eki rus tankeriniñ qazasından soñ, büyük bir yağ tökülmesinden deñiz müitine ciddiy zarar ketirgeninden dolayı ekologik telükesizlik meselesine ayrı diqqat ayırıldı.

Türkiyege Ukrainağa destek köstergeni içün teşekkürler bildiremiz!