Tünevin, iyünniñ 20-nde, Daimiy Temsilci Tamila Taşeva ve Qırım Platformasınıñ faaliyetini temin etüv hızmetiniñ yolbaşçısı Mariya Tomak “Razom Avdocacy” teşkilâtınıñ qurucısı ve advokatsiya meselelerinden vitse-prezidenti Mariya Soroka, advokatsiyadan ortaq Loran Giyom, program assistenti Kira Çernenko ve Darına Lesnâk ile bir arağa keldi.

Körüşüv vaqtında yapıla bilecek işbirlik, halqara meydanda, hususan da Amerika Qoşma Ştatlarında, Qırım ve başqa işğal etilgen topraq meseleri advokatsiyasınıñ arttırılması meseleleri müzakere etildi.

Tamila Taşeva Temsilcilikniñ halqara meydanlarda, hususan Qırım Platforması Ofisi esasında yapılğan tedbirler ve teşebbüsler vastasınen ve cemaat teşkilâtlarınen işbirlik sayesinde advokatsiya faaliyetini kerçekleştirgenini bildirdi. Faqat, bu tedbirlerniñ arttırılması kerekligi ve rusiyeniñ başqa devletlerde yayğan imperial añlatuvlarnı yoq etüvni devam ettirme emiyeti qayd etildi.

Körüşüv çerçivesinde Temsilcilik taqımı tasil saasında işbirlik arttırılmasınıñ mümkün olğan aletler aqqında da aytıp berdi.

“Razom Advocacy” temsilcileri ise, çetelde yapılğan advokatsiya kampaniyalarınıñ tecribeleri ve ğayelerinen paylaştı. Hususan, olar endi keçirilgen teşebbüslerge, hususan sürgünlikniñ 80-ncı yıllığına bağışlanğan tedbirlerge qol tutqanlarını bildirdi.

Temsilcilik taqımı ve “Razom Advocacy” temsilcileri kelecekte bağlarnıñ qurulması ve Qırım mevzusında işbirlikniñ arttırılması aqqında qonuştı.