Daimiy Temsilci Olga Kurışko Qırım Muhtar Cumhuriyeti ve Aqyar şeeri prokuraturasınıñ yolbaşçısı Nariman Suleymanovnen iş körüşüvi keçirdi. Körüşüvde ayrıca Daimiy Temsilciniñ muavini Denıs Çıstikov ve Qırım Muhtar Cumhuriyeti ve Aqyar şeeri prokuraturası yolbaşçısınıñ muavini Vitaliy Sekretar iştirak ettiler.

Taraflar Temsilcilik ve Prokuratura arasında çoq yıllıq işbirlikni ve rusiye tarafından vaqtınca işğal etilgen Qırımda yapılğan cinayetlerni qayd etüvge ve araştıruvğan yönelik sistemalı ortaqlıqnı qayd ettiler.

Körüşüv devamında ortaq leyhalarnıñ ömürge keçirilmesini, hususan 2025 senesi başlanğan ve yarımadada “işğalci memuriyet” tarafından yapılğan cinayetler aqqında şaatlıqlar toplamaqnı közde tutqan “Şaatlıq et” media teşebbüsini muzakere ettiler.

Qırımnıñ medeniy mirasını qorçalav, qanunsız arheologik qazılmalarnıñ faktlarını vesiqalaştıruv ve medeniy degerliklerniñ çıqarılması boyunca işbirlikke ayrıca diqqat ayırıldı. Taraflar Ukrayinanıñ sanktsiya siyasetini ileride amelge keçirmek içün yarımadanı işğal etmege yardım etken şahıslar aqqında malümat azırlav ve işlev ceryanı aqqında da söz yürsettiler.

Temsilcilik cinayetçilerni mesüliyetke çekmek ve adaletni tiklemek maqsadınen kelcekte de Qırım Muhtar Cumhuriyeti ve Aqyar şeeri Prokuraturasınen işbirlikni devam etecek.